კვლევითი კომპანია „გორბის“ დირექტორის მერაბ ფაჩულიას თქმით, „გორბმა“ გუშინ დაასრულა კვლევა, რომლის მიხედვითაც, სალომე ზურაბიშვილი მეორე ტურში 52%-ზე მეტს მიიღებს. ფაჩულიას თქმით, მისი კომპანიის ჩატარებული კვლევით, „ქართული ოცნების“ მხარდაჭერილი კანდიდატი იმაზე მეტ ხმას იღებს, ვიდრე „გელაპის“ მონაცემებით, სადაც ზურაბიშვილი ვაშაძეს 4%-ით ამარცხებს.

„ქართველი ხალხი ხმას აძლევს სტაბილურობას. 90-იანი წლებიდან მოყოლებული ჩვენ არ გვქონია 6 წელი, რომ ერთმანეთისთვის ან შემოჭრილი რუსებისთვის არ გვესროლა. ეს არის ის 6 წელი, თუმცა არა მგონია, რომ ამას კარგად აცნობიერებდეს თავად „ქართული ოცნებაც“. ამიტომ ხდება მუდმივად აპელირება იმ „9 წელზე“. სტაბილურობა ასოცირდება „ოცნებასთან“, მე ვიტყოდი, რომ რაც გააკეთა „გელაპმა“ 52% ზურაბიშვილის სასარგებლოდ და 48% - ვაშაძეს, არის ძალიან კონსერვატული“, - თქვა ფაჩულიამ ტელეკომპანია „იმედის“ ეთერში.

მისი აზრით, სალომე ზურაბიშვილის „მეტი წონა“ უნდა მიეცეს. ის იმარჯვებს იმაზე მეტი პროცენტით, ვიდრე ეს „გელაპის“ კვლევაშია წარმოდგენილი.

ფაჩულიამ არ დაასახელა წინასაარჩევნო კვლევის დამკვეთი. მისი თქმით, ეს არის ამერიკელი კლიენტი, რომლის ვინაობასაც კონტრაქტის პირობებიდან გამო ვერ იტყვის.