„რაც უფრო ახლოვდება არჩევნები, მით უფრო აქტიურად ირთვება „ნაციონალური მოძრაობა“ და მისი პროპაგანდისტული მანქანა“,- ეს განცხადება „ქართული ოცნების“ დეპუტატმა, მამუკა მდინარაძემ პარტიის ოფისში გამართულ ბრიფინგზე განაცხადა. 

მისი შეფასებით, ოპოზიციურმა პარტიამ საზოგადოებისთვის კიდევ ერთი ტყუილის, ფარული ჩანაწერის შესაღება სცადა. მდინარაძის თქმით, ამ ტიპის ჩანაწერის შექმნა ნებისმიერი ორი პირის საუბრის ჩანაწერით შეუძლია „რუსთავი 2-სა“ და „ნაციონალურ მოძრაობას“.

„რუსთავი 2-ის“ მიერ დღეს გამოქვეყნებულ ვითომდა ფარულ ჩანაწერში საუბარია, თითქოს „ქართული ოცნების“ რეგისტრირებული ამომრჩევლისა და რეალურად მიღებულ ხმებს შორის 40 პროცენტიანი სხვაობა არსებობს და ამის აღმოსაფხვრელად ჩვენი გუნდი საარჩევნოდ გარკვეულ მანიპულაციებს გეგმავს. რა თქმა უნდა, მათ მიერ გავრცელებული ინფორმაცია სრული აბსურდი და მტკნარი სიცრუეა. მათი სქემის ნაწილია გურჯაანსა და რუსთავში, ვითომდა ოპოზიციის წინააღმდეგ მოწყობილი პროვოკაციები და ე.წ. მოლოტოვის კოქტეილთან დაკავშირებული ინციდენტები“,- განაცხადა მამუკა მდინარაძემ ბრიფინგზე. 

დეპუტატის შეფასებით, „ნაციონალური მოძრაობა“ ყველაფერზე მიდის, რათა როგორმე დააგროვოს „კომპრომატები“, თითქოს მათ წინააღმდეგ პოლიტიკურ ანგარიშსწორება ხდება. მდინარაძის თქმით, ყველაფერი, რასაც მთელი ამ პერიოდის განმავლობაში „ნაციონალები“ „ქართულ ოცნებას“ აბრალებენ, ისინი თავად სჩადიან.

„ჩვენ არა ერთხელ განვაცხადეთ, რომ შკლიაროვისა და „ნაციონალური მოძრაობის“ სტილია, რომ სხვას დააბრალონ ის, რასაც თავად წლების განმავლობაში სჩადიოდნენ. ცნობილი გახდა ინფორმაცია, რომ ჩხოროწყუს რაიონში „ნაციონალური მოძრაობის“ აქტივისტების მხრიდან ამომრჩევლის მოსყიდვის ფაქტები დაფიქსირდა. დოკუმენტი, რომლითაც აღნიშნული ქმედების შესახებ ცნობილი ხდება, შინაგან საქმეთა სამინისტროშია გადაგზავნილი და დადასტურების შემთხვევაში, შესაბამისი უწყებები უმკაცრეს რეაგირებას მოახდენენ აღნიშნულ ფაქტზე“,- აცხადებს მდინარაძე.