სამაუწყებლო კომპანია „რუსთავი 2-მა“ ეგზიტპოლის 17:00 საათისთვის არსებული მონაცემები გამოაცხადა. ეგზიტპოლის მიხედვით, საპრეზიდენტო არჩევნების მეორე ტურში  სალომე ზურაბიშვილი იმარჯვებს.

გაერთიანებული ოპოზიცია „ძალა ერთობაშიას“ კანდიდატს 45% აქვს, „ქართული ოცნების“ მხარდაჭერილ კანდიდატს სალომე ზურაბიშვილს კი 55%.

ეგზიტპოლი ტელეკომპანია „რუსთავი 2-ის“ დაკვეთით საერთაშორისო კვლევითმა კომპანია Edison Research-მა ჩაატარა.

მეორე ტურის ეგზიტპოლის გამოკითხვის დროა 2018  წლის 28 ნოემბერი. გამოკითხვის მეთოდი - პირდაპირი გამოკითხვა თვითადმინისტრირებული კითხვარით. შესაძლო ცდომილების ზღვარია +/–3 %.

ამავე კომპანიის ჩატარებული ეგზიტპოლის შედეგები საპრეზიდენტო არჩევნების პირველ ტურში მეტწილად დაემთხვა საარჩევნო კომისიის მიერ გამოცხადებულ შედეგებს. ეგზიტპოლში „ქართული ოცნების“ მხარდაჭერილმა კანდიდატმა, სალომე ზურაბიშვილმა ხმების 40 % მიიღო. ასევე 40% მიიღო გაერთიანებული ოპოზიციის კანდიდატმა, გრიგოლ ვაშაძემ.

ცესკო-ს საბოლოო შედეგებით არჩევნების პირველ ტურში სალომე ზურაბიშვილმა ხმების 38.64% მიიღო, გრიგოლ ვაშაძემ კი 37.74%.