პრეზიდენტის ადმინისტრაციაში არ აკეთებენ კომენტარს, უფლებამოსილების ვადის ამოწურვამდე კიდევ შეიწყალებს თუ არა მსჯავრდებულებს პრეზიდენტი გიორგი მარგველაშვილი.

„თეთრი ხმაურის მოძრაობის“ აქტივისტმა, დათო სუბელიანმა გუშინ Facebook-ით გაავრცელა ინფორმაცია, რომ პატიმართა ოჯახის წევრების ინფორმაციით, შეწყალების კომისიის მორიგი სხდომა აღარ ჩატარდა.

Facebook-პოსტზე შეწყალების კომისიის თავმჯდომარის, ზვიად ქორიძის განმარტებით, თუ შეწყალების კომისიის სხდომა შეწყდება, რადგან არ იქნება შეწყალების აქტი, ამას საჯაროდ იტყვიან.

„ჩვენი კომისია 16 დეკემბრამდე მოქმედებს და იგი მიაწვდის რეკომენდაციებს პრეზიდენტს იმის გათვალისწინებით, გეგმავს თუ არა პრეზიდენტი შეწყალებას...  ჩვენ ვმუშაობთ და რა გადაწყვეტილებას მივიღებთ, საზოგადოებას აუცილებლად ვამცნობთ“, - აღნიშნა ქორიძემ.

ქორიძის ამ კომენტარის შემდეგ, „ლიბერალმა“ შეკითხვით მიმართა პრეზიდენტის ადმინისტრაციას - აპირებს თუ არა პრეზიდენტი მარგველაშვილი შეწყალების აქტის გამოცემას. როგორც უკვე აღვნიშნეთ, ადმინისტრაციაში ამ საკითხზე კომენტარს არ აკეთებენ.

გიორგი მარგველაშვილის უფლებამოსილების ვადა 4 დღეში, 16 დეკემბერს იწურება, არჩეული პრეზიდენტის ფიცის დადებისთანავე.