იუსტიციის უმაღლესი საბჭოს წევრის, ნაზი ჯანეზაშვილის ინფორმაციით, ამ წუთებში ცნობილი გახდა უზენაესი სასამართლოს მოსამართლეობის კანდიდატები, რომლებსაც საბჭო პარლამენტში წარსადგენად უყრის კენჭს. 

საბჭომ პროცედურების შემუშავების გარეშე შემდეგი კანდიდატურები დაასახელა: 

თამარ ალანია, მერაბ გაბინაშვილი, დიმიტრი გვრიტიშვილი, გიორგი მიქაუტაძე, ნინო სანდოძე, პაატა სილაგაზე, გიორგი ტყავაძე, ნინო ქადაგიძე, მიხეილ ჩინჩალაძე, მარიამ ცისკაძე. 

საქართველოს კონსტიტუციის ახალი რედაქციის თანახმად, უზენაესი სასამართლოს მოსამართლეობის კანდიდატებს იუსტიციის უმაღლესი საბჭო პარლამენტს დასამტკიცებლად წარუდგენს. კანონმდებლობით უზენაესი სასამართლოს მოსამართლეტა რაოდენობა 28 წევრით განისაზღვრა. ამჯამად 18 თანამდებობა ვაკანტურია. 

იუსტიციის საბჭოს 17 დეკემბრის სხდომაზე ნაზი ჯანეზაშვილმა წარადგინა პროექტი, რომელიც კანდიდატების შესარჩევად ღია კონკურსის გამოცხადებას და საკონსულტაციო ჯგუფის შექმნას ითვალისწინებს. პროექტის თანახმად, აღნიშნული ჯგუფი პროცესზე დაკვირვების შედეგად კანდიდატების შესახებ სარეკომენდაციო ხასიათის დასკვნას მოამზადებს. საბჭოს წევრებმა კენჭი არ უყარეს არც საკითხის მიღებას და არც მის გადადებას.  

ვინ არის მიხეილ ჩინჩალაძე? ნახეთ, სტუდია „მონიტორის" საგამოძიებო ფილმი: „ჩინჩალაძის კლანი".