„პატრიოტთა ალიანსის" დეპუტატი ემზარ კვიციანი ჩადრით, ნიქაბით და ბურკით სიარულის აკრძალვის შესახებ პარლამენტში ადამიანის უფლებათა კომიტეტის სხდომაზე დღეს კანონპროექტს წარადგენს. საკანონმდებლო ინიციატივის ავტორი ზვიად ტომარაძეა.

კანონპროექტის მიღების მიზეზად კვიციანი საქართველოში ბოლო პერიოდში გახშირებული ჩადრით, ნიქაბით და ბურკით ტურისტების სიარულს ასახელებს.

განმარტებითი ბარათში დეპუტატი მიუთითებს, აღნიშნული სამოსელი არ იძლევა პიროვნების იდენტიფიცირების საშუალებას, გარდა ამისა, შეიცავს საფრთხეებს ტერორიზმის კუთხით.

„ევროპის ქვეყნებში უკვე მოქმედებს აკრძალვები ამ კუთხით. კერძოდ, ჩადრით, ნიქაბით და ბურკით სიარული აკრძალულია: ჰოლანდიაში, ბელგიაში, საფრანგეთში, ავსტრიაში, ბულგარეთში და ლატვიაში. მიმდინარე წლის 1 ივლისიდან ამ ქვეყნების რიცხვს დანიაც შეუერთდა“, - ვკითხულობთ განმარტებით ბარათში.

კანონპროექტის მიხედვით, ჩადრით, ნიქაბითა და ბურკით სიარული ხდება დასჯადი ქმედება და სამართალდამრღვევს ეკისრება ფულადი ჯარიმა. პირველ შემთხვევაზე 500 ლარი, განმეორებით შემთხვევაზე 1500 ლარი.

კანონპროექტი ითვალისწინებს ადმინისტრაციულ სამართალდარღვევათა კოდექსში 169-ე პრიმა მუხლის დამატებას - „საზოგადოებრივ ადგილებში ჩადრით, ნიქაბით და ბურკით სიარული“; პროექტში აღნიშნულია, რომ სკვერში, პარკში, ყველა სახის საზოგადოებრივ ტრანსპორტსა და სხვა საზოგადოებრივ ადგილებში ჩადრით, ნიქაბით და ბურკით სიარული - დაჯარიმდება 500 ლარის ოდენობით. იგივე ქმედება ჩადენილი განმეორებით - დაჯარიმდება 1500 ლარის ოდენობით.

კანონპროექტში შენიშვნის სახით მითითებულია, რომ აკრძალვა არ ვრცელდება საქართველოში აკრედიტირებული დიპლომატიური კორპუსის თანამშრომლებზე.