დღეს, 26 დეკემბერს სემეკი მსჯელობს შპს „ყაზტრანსგაზ თბილისისთვის“, შპს „სოკარ ჯორჯია გაზისთვის“ და სს „საქორგგაზისთვის“ ბუნებრივი გაზის მიწოდების, განაწილების, გატარების და მოხმარების 2019 წლის ტარიფების დადგენის შესახებ. 

გაზის ტარიფის გაზრდის წინააღმდეგ „ლეიბორისტები" სემეკთან აქციას მართავენ

სემეკის განცხადებით, ზემოაღნიშნულ კომპანიებს ტარიფები დადგენილი აქვთ 2018 წლის 31 დეკემბრის ჩათვლით და შესაბამისად, მათ ტარიფები უნდა დაუდგინდეთ მომდევნო საანგარიშო პერიოდისთვის. 

„კომისიის სხდომაზე გაჟღერდება კომისიის აპარატის მოსაზრებები, კომპანიები გამოხატავენ საკუთარ პოზიციებს, რომელიც, შესაძლოა, არ ემთხვეოდეს კომისიის აპარატის პოზიციას და კომისიამ უნდა მიიღოს შესაბამისი გადაწყვეტილება ამ მსჯელობის შემდეგ. შეიცვლება თუ არა საერთოდ სამომხმარებლო ტარიფი, ან როგორ შეიცვლება ეს მხოლოდ და მხოლოდ დამოლიდებულია კომისიის გადაწყვეტილებაზე. ტარიფი ძალაში აუცილებლად შევა 1 იანვრიდან, რადგან მოქმედი ტარიფის ვადა იწურება მიმდინარე წლის ბოლოს“, - აცხადებს სემეკის ტარიფებისა და ეკონომიკური ანალიზის დეპარტამენტის დირექტორი გივი სანიკიძე.