პარტიზანი მებაღე ნატა ფერაძე სასამართლომ შეურაცხმყოფელი ჟესტების გამოყენებით მშენებლობის შეფერხებისთვის 500 ლარით დააჯარიმა. ამის შესახებ „ლიბერალს“ ნატა ფერაძე ესაუბრა.
საქმე ეხება ჭოველიძის ქუჩის ბოლოში, მთაწმინდაზე დაწყებულ შენებლობას. როგორც ნატა ფერაძე „;ლიბერალთან“ ამბობს, ამ ადგილზე ინტენსიურად მიმდინარეობს კლდის ჭრა.
„ძველი გენგეგმით ეს არის სარეკრეაციო ზონა, ახალი გენგემით, რომელიც იანვრიდან შევა ძალაში ეს არის სატყეო ზონა, რომელსაც კიდევ უფრო მკაცრი დაცვა აქვს", - ამბობს ნატა ფერაძე.
პარტიზანი მებაღე ჰყვება, რომ ამ ტერიტორიაზე მშენებლობის ნებართვა დავით ნარმანიას მიერ დაშვებული სპეციალური ზონალური შეთანხმებით გაიცა. მშენებლობა 2014 წელს დაიწყო, მაგრამ შემდეგ შეჩერდა. წელს კი კახა კალაძის მიერ ნებართვა განახლდა, ტერიტორიაზე მძიმე ტექნიკა შევიდა და კლდის ჭრა გაგრძელდა.
„ვაპირებთ, რა თქმა უნდა, სამართლებრივად მივმართოთ მერიას, სასამართლოს და ა. შ., თუმცა სამართლებრივი პროცესი, როგორც გამოცდილება გვაჩვენებს, ვაკის პარკის და სხვა ობიექტის შემთხვევაში, წლები გრძელდება. ამასობაში თუკი მოჭრიან აქ კლდეს, სამი წლის მერე სასამართლო პროცესის მოგების შემთხვევაშც კი, უკვე მოჭრილ კლდეს ვეღარ აღვადგენთ, არაფერი ეშველება, ამიტომ მიწევს ფიზიკურად მშენებლობისთვის ხელის შეშლა.
სწორედ ამიტომ, მე, ჩემი ძაღლი და ორი აქტივისტი შევედით ტერიტორიაზე, ძალიან უხეშად გვექცეოდნენ თვითონ სამშენებლო ფირმის წარმომადგენლები, რაზეც ვერ გეტყვით, რომ ძალიან ზრდილობიანი დიქცია იყო, მაგრამ პირდაპირი შეურაცხყიფა არ მიმიყენებია. გადაწყვეტილებაში წერია, რომ შუა თითის აწევისთვის, ანუ შეურაცხმყოფელი ჟესტებისთვის დამაჯარიმეს 500 ლარით ამჯერად", - ამბობს ნატა ფერაძე.
ნატა ფერაძე მიიჩნევს, რომ მშენებლობა ქალაქისთვის დამღუპველი იქნება და კიდევ ერთი მძიმე დარტყმა. ამიტომ პარტიზანი მებაღეები აპირებენ ინტენსიურ აქციებს, იმისათვის, რომ შენებლობას ხელი შეუშალონ.
