ჯანდაცვის მინისტრის დავით სერგეენკოს თქმით, აფთიაქებში გრიპის ვირუსის საწინააღმდეგო პრეპარატი „ტამიფლუ“ დეფიციტური გახდა. ამის გამო, სახელმწიფომ იმ რისკ-ჯგუფების ჩამონათვალი გააფართოვა, რომლებსაც მედიკამენტს უფასოდ გადასცემენ.
„ტამიფლუ“ უფასოდ ორსულებისა და სოციალურად დაუცველებისთვის გაიცემოდა. დღეიდან კი მედიკამენტს, მინისტრის თქმით, უფასოდ მიიღებენ ბავშვები, ასაკით პენსიონრები, დიაბეტის, გულსისხლძარღვთა, ონკოლოგიური თუ სასუნთქი გზების დაავადების მქონე პირებიც.
სერგეენკოს თქმით, ამ რისკ-ჯგუფებში შემავალ მოქალაქეებს შეუძლიათ, მიმართონ საზოგადოებრივი ჯანდაცვის განყოფილებებს, რომლებიც ჯანდაცვის სამინისტროს მარაგებიდან იღებენ მედიკამენტს.
„ინფორმაცია, რომელ აფთიაქებში იქნება „ტამიფლუ“, ჯანდაცვის სამინისტროს ცხელი ხაზიდან – 1505 შეგიძლიათ მიიღოთ. ცხელ ხაზზე ოპერატორების რაოდენობა გაიზრდება, რომ ინფორმაცია დროულად მიიღონ მომხმარებლებმა“, - განაცხადა დავით სერგეენკომ.
მინისტრის თქმით, ამჟამად სახელმწიფოს ანტივირუსული მედიკამენტების საკმარისი მარაგი აქვს და მისი დეფიციტი ბოლო ორი დღის განმავლობაში მხოლოდ სააფთიაქო ქსელებში შეიქმნა. მედიკამენტის მარაგი ხელახლა 10 იანვარს შეივსება.
