დმანისი-ტაშირის, დიდი ბრიტანეთისა და ირლანდიის მთავარეპისკოპოსის ზენონის თქმით, „ციანიდის საქმე“ ეკლესიის წევრებისა და ქვეყნისთვის შავი ლაქაა. მთავარეპისკოპოსი ზენონი წერს, რომ დეკანოზ გიორგი მამალაძის შეწყალება საზოგადოებაში მშვიდობის განმტკიცებას შეუწყობს ხელს.
„არ ვიცნობ დეკანოზ გიორგი მამალაძეს. არც ის ვიცი, რამდენად დამნაშავეა ან უდანაშაულო. მე მხოლოდ ის ვიცი, რომ საპყრობილეში მისი ყოფნა, მითუმეტეს „მკვლელობის მცდელობის“ ბრალდებით, დამნაშავეა თუ უდანაშაულო, ჩვენი სირცხვილია მთლიანობაში.
ჩემი სინდისის ხმით ვაცხადებ: ვფიქრობ, დეკანოზი გიორგი მამალაძის შეწყალება, ეკლესიაში და ზოგადად საზოგადოებაში, ხელს შეუწყობს ღვთივსულიერი მშვიდობის განმტკიცებას“, - წერს მეუფე ზენონი.
მთავარეპისკოპოსის თქმით, ბევრ ადამიანს „ციანიდის საქმეზე“ უსამართლობისა და უნდობლობის განცდა გაუჩნდა. საზოგადოებაში რადიკალური მოსაზრებები გაჩნდა, რაც ქვეყანას აზიანებს.
„რადგან, ქრისტეა შემრიგებელი მასწავლებელი და მოძღვარი, რომელმაც ღმერთთან შეარიგა ადამიანი, მოგვეთხოვება არ გვიძნელდებოდეს ერთმანეთთან მშვიდობისა და შენდობის ამბორი. ამ გზით მესახება ნაიარევთა ეფექტური კურნება.
თავს ვერ დავაღწევთ იმას, რომ ე. წ „ციანიდის საქმე“ თანამედროვე ეკლესიის წევრთათვის, ქვეყნისთვის წარმოადგენს შავ ლაქას. მრავალს გაუჩნდა უსამართლობისა და უნდობლობის განცდა. ზოგს ბრალდებულის უდანაშაულობის სჯერა. ზოგს მის დანაშაულში ეჭვი არ ეპარება, ოღონდ წარმოდგენილი „შესაძლო მსხვერპლის“ ვერსია მისთვის არადამჯერებელია. ჩვენთვის დამახასიათებელი უკიდურესობის გარემოებით ზოგიერთისთვის დეკ. გიორგი მამალაძე „სიმართლისათვის დევნილია“ და ზოგიერთისათვის „ცოდვილთა შორის ცოდვილი“, - ნათქვამია მთავარეპისკოპოსის განცხადებაში.
