პარლამენტის თავმჯდომარემ ჟურნალისტებთან პატრიარქის ეპისტოლეში სიტყვისა და გამოხატვის თავისუფლებასთან დაკავშირებულ ნაწილი შეაფასა.
"ეს არის პრობლემა და პრობლემას სჭირდება დაფიქრება თუ როგორ მოგვარდეს ის. რა თქმა უნდა ჩვენთვის გამოხატვის თავისუფლება უზენაესია და გაუმართლებელი ფორმით არ უნდა შეიზღუდოს გამოხატვის თავისუფლება. გამოხატვის თავისფლების ფარგლებში რა ზომებიც შეიძლება, რომ იყოს მიღებული ჩვენ უნდა ვიფიქროთ. მათ შორის კანონმდებლობის ფარგლებში. უფრო საუბარი შეიძლება იყოს კანონმდებლობაში ცვლილებებზე. არ გამოვრციხავ რომ საგაზაფხულო სესიაზე რამე გადაწყვეტილება იქნეს მიღებული. დღეს კონკრეტულს ვერაფერს გეტყვით." - განაცხადა ირაკლი კობახიძემ.
„არის დიდი მცდელობა სიტყვის თავისუფლების დამახინჯებული აღქმის გაბატონებისაც" - ამის შესახებ საქართველოს პატრიარქის, ილია II-ის საშობაო ეპისტოლეშია ნათქვამი, რომელიც ცოტა ხნის წინ სამების საკათედრო ტაძარში წაიკითხეს.
„თავისთავად სიტყვის თავისუფლება საზოგადოებისთვის უმნიშვნელოვანესი უფლებათაგანია, რომელიც ნებისმიერ მოქალაქეს საშუალებას აძლევს, საკუთარი შეხედულებისამებრ, საჯაროდ გამოთქვას აზრი და ამისთვის გამოიყენოს მასმედიაც და სოციალური ქსელიც, რაც პიროვნული თავისუფლების განცდას ბადებს და ნანახისა თუ ნააზრევის სხვისთვის გაზიარების შესაძლებლობას ქმნის, მაგრამ, სამწუხაროდ, ხშირად ხდება რეალობის შეცვლა და სიტყვის თავისუფლებით ბოროტად სარგებლობა" - ნათქვამია ეპისტოლეში.
