საპარლამენტო უმრავლესობის წევრის, ლევან კობერიძის თქმით, იუსტიციის უმაღლესი საბჭო დასაშლელია. ლევან კობერიძემ „პალიტრანიუსის“ ეთერში განაცხადა, რომ მოსამართლეების დამტკიცების პროცესი პარლამენტში უნდა გადავიდეს, რადგან ის გამჭვირვალეა და დეპუტატები არ ერიდებიან ღია დისკუსიებს.
„მე რომ მკითხოთ და პირადად მაქვს ეს მოსაზრება, რომ იუსტიციის საბჭო საერთოდ დასაშლელია უკვე ახლა. იმ ფორმით და იმ სახით, როგორითაც ის არსებობს და რა ქმედებებსაც ის დღეს სჩადის, არის დასაშლელი. გადმოვიტანოთ მოსამართლეების დამტკიცების პროცესი პარლამენტში, პარლამენტში, რომელიც გამჭვირვალეა, არ ერიდება ღია დისკუსიებს“, - განაცხადა კობერიძემ.
მისი თქმით, ძალიან ბევრი პროფესიონალი იურისტი არსებობს, რომელიც სისტემის გარეთ არის დარჩენილი, რადგან ისინი იუსტიციის საბჭოს თანხმობის გარეშე ამ სისტემაში ვერ შედიან.
„იმავე სისტემაზე გეტყვით, ძალიან ბევრი გამოცდილი, პორფესიონალი იურისტი არსებობს, რომელიც სისტემის გარეთ არის დარჩენილი. დღეს სისტემა ჩაკეტილია. 300 ადამიანი ამ იუსტიციის საბჭოს თანხმობის გარეშე, ფაქტობრივად, სისტემაში ვერ შედის ადამიანი. ეს ძალიან მძიმე შედეგამდე მიიყვანს ქვეყანას და არიან ადამიანები, რომლებიც ამ სისტემაში გამოცდილებიც არიან, წესიერებიც, პროფესიონალებიც და სამართლიანი გადაწყვეტილებებიც აქვთ მიღებული“,- აღნიშნა კობერიძემ.
