„ევროპული საქართველოს“ პოლიტსაბჭოს თავმჯდომარე გიგა ბოკერია ხელისუფლებისგან მოითხოვს, გამოხატონ პოზიცია უკრაინის ეკლესიის ავტოკეფალიის მოპოვებაზე.
პარლამენტის წევრის თქმით, რუსული ეკლესია არის პუტინის რეჟიმის ინსტრუმენტი და ამის გამო, უკრაინის ეკლესიის ავტოკეფალია მნიშვნელოვანი გეოპოლიტიკური საკითხია. ამიტომ აუცილებელია, საზოგადოებამ იცოდეს, რა პოზიცია აქვს „ქართულ ოცნებას“ ამ თემაზე.
„ყველას გვესმის, რომ ეს არ არის მხოლოდ საეკლესიო საკითხი. იმ მარტივი მიზეზის გამო, რომ რუსეთში ეკლესია არის შერწყმული ხელისუფლებასთან, პუტინის რეჟიმთან და წარმოადგენს ამ რეჟიმის ინსტრუმენტს მეზობლების წინააღმდეგ აგრესიასა და მთლიანად მსოფლიოში თავისუფლების წინააღმდეგ.
ეს არის უმნიშვნელოვანესი გეოპოლიტიკური შედეგების მომტანი მოვლენა და არ არის მხოლოდ უკრაინელი ხალხის გამარჯვება. ჩვენ საქართველოში გვაქვს ნანახი, როგორ იყენებს რუსული ეკლესიის გავლენას პუტინის რეჟიმი ჩვენ წინააღმდეგ. პირდაპირ აგრესიასა თუ პროპაგანდაში ჩვენი თავისუფლების წინააღმდეგ“, - თქვა გიგა ბოკერიამ პარლამენტში გამართულ ბრიფინგზე.
როგორც ბოკერიამ აღნიშნა, „ევროპული საქართველოს“ ლიდერებმა მიულოცეს უკრაინელ ხალხს ეს გამარჯვება, მაგრამ ხელისუფლებაში მხოლოდ პრეზიდენტმა სალომე ზურაბიშვილმა გამოხატა პოზიცია და ისიც გაუგებარი იყო.
„მან ეკლესიისკენ გაიშვირა ხელი, რაც ფუნდამენტურად არასწორია, რადგან ჩვენი კონსტიტუციით, სახელმწიფო და ეკლესია არის გაყოფილი.
საზოგადოების წინაშე პირდაპირ ანგარიშვალდებული არის ხელისუფლება. ამიტომ მინდა, მედიის საშუალებით დავუსვა ეს შეკითხვა და მედიამ ჰკითხოს ხელისუფლებას, რატომ აქვთ ის პოზიცია, რაც აქვთ თუ საერთოდ გააჩნიათ პოზიცია“, - თქვა ბოკერიამ.
„ევროპული საქართველოს“ ერთ-ერთი ლიდერის თქმით, ხელისუფლებას ამ კითხვებზე პასუხის გაცემა მაინც მოუწევს, რადგან საპარლამენტო უმცირესობა პარლამენტში მათ დაბარებას აპირებს. თუმცა, ბოკერიას თქმით, საქართველოსთვის ახლა თითოეული დღე პოზიციის გარეშე ზიანის მომტანია.
„თითოეული დღე არის ზიანის მომტანი, როგორც ჩვენი საერთაშორისო პოზიციების, ისე ქვეყნის შიგნით მიმდინარე საზოგადოებრივი დისკუსიისთვის და იმ პროპაგანდის წინააღმდეგ, რომელსაც რუსეთი ეწევა საქართველოში“, - დასძენს ბოკერია.
