იუსტიციის უმაღლესი საბჭოს არამოსამართლე წევრებმა, ნაზი ჯანეზაშვილმა და ანა დოლიძემ პარლამენტს წარუდგინეს საკანონმდებლო წინადადება, თუ როგორ უნდა მოხდეს უზენაესი სასამართლოს მოსამართლეობის კანდიდატების წარდგენა.
„სამართლიანი სასამართლოსთვის ბრძოლის მეორე ეტაპი დავიწყეთ მე და ნაზი ჯანეზაშვილმა დღეს. პარლამენტში შემოვიტანეთ საკანონმდებლო წინადადება, რომელიც 5 აუცილებელ პრინციპს მოიცავს და რომლის მიხედვით, უნდა დავნიშნოთ უზენაესი სასამართლოს მოსამართლეები. მთავარი ამ 5 პრინციპში არის ის, რომ იუსტიციის საბჭომ გადაწყვეტილება უნდა მიიღოს ერთხმად“, - განაცხადა ანა დოლიძემ.
იუსტიციის უმაღლესი საბჭოს არამოსამართლე წევრის ნაზი ჯანეზაშვილის თქმით, ამ საკანონმდებლო წინადადებით პარლამენტს სთავაზობენ საკონსულტაციო ჯგუფის შექმნას, რომელიც იქნება დამოუკიდებელი და მოამზადებს დამოუკიდებელ დასკვნას.
„ვთავაზობთ კონკურსის გამოცხადების სტანდარტის შემოღებას, ვთავაზობთ ინტერესთა კონფლიქტის გამორიცხვის სტანდარტის შემოღებას, საჯარო გასაუბრებას და ასევე ვთავაზობთ, რომ შეიქმნას საკონულტაციო ჯგუფი, რომელშიც შევლენ ადვოკატთა ასოციაციის, სახალხო დამცველის, უზენაესი სასამართლოს და სამოქალაქო საზოგადოების ორგანიზაციების წარმომადგენლები. ვფიქრობთ, მნიშვნელოვანია, შეიქმნას დამოუკიდებელი რგოლი, რომელიც მოამზადებს დამოუკიდებელ დასკვნას“, - განაცხადა ჯანეზაშვილმა.
-----------------------------------------
დეტალურად გაეცანით 5-პუნქტიანი საკანონმდებლო წინადადების პრინციპებს:
საქართველოს იუსტიციის უმაღლესი საბჭოს მიერ უზენაესი სასამართლოს კანდიდატურების წარდგენაზე გადაწყვეტილებების მიღების პროცედურა უნდა იყოს სამართლებრივად რეგულირებული, რომელიც უნდა იცავდეს სამართლებრივი განჭვრეტადობის, ეფექტიანობის, სასამართლო დამოუკიდებლობისა და სხვა ძირითად პრინციპებს. შესაბამისად, იუსტიციის უმაღლესი საბჭოს წევრები ნაზი ჯანეზაშვილი და ანა დოლიძე საქართველოს პარლამენტს საკანონმდებლო წინადადებით მიმართავენ, რომელიც 5 ძირითად პრინციპს მოიცავს:
- საკონსულტაციო ჯგუფის შექმნა უმაღლესი საბჭო ვალდებულია, უზენაესი სასამართლოს მოსამართლეობის კანდიდატთა შესარჩევად შექმნას საკონსულტაციო ჯგუფი.
საკონსულტაციო ჯგუფის შემადგენლობა განისაზღვრება 7 წევრის შემადგენლობით. საკონსულტაციო ჯგუფის წევრები შეირჩევიან შემდეგი წესით: საქართველოს უზენაესი სასამართლო თავისი შემადგენლობიდან წარადგენს 2 წევრს; საქართველოს სახალხო დამცველი - 2 წევრს; საქართველოს ადვოკატთა ასოციაცია - 2 წევრს; საქართველოს არასამეწარმეო (არაკომერციული) იურიდიული პირების გაერთიანება, რომლის წევრთა საქმიანობის ერთ-ერთი სფეროს, კონკურსის გამოცხადებამდე არანაკლებ ბოლო 3 წლის განმავლობაში, სასამართლო სისტემის რეფორმების ხელშეწყობა და იუსტიციის უმაღლესი საბჭოს საქმიანობის მონიტორინგი წარმოადგენს- 1 წევრს;
საკონსულტაციო ჯგუფი უზენაესი სასამართლოს მოსამართლეობის კანდიდატთან გასაუბრების დასრულების შემდეგ იუსტიციის უმაღლეს საბჭოს წარუდგენს დასკვნას კანდიდატთა შესახებ. საკონსულტაციო ჯგუფის დასკვნა არის სარეკომენდაციო ხასიათის.
კანდიდატების შერჩევის პროცედურაში დამატებითი რგოლის, საკონსულტაციო ჯგუფის შემოტანით მინიმუმამდე არის დაყვანილი პროცესის არაკეთილსინდისიერად და სუბიექტურად წარმართვის შესაძლებლობა.
- უზენაესი სასამართლოს მოსამართლეობის კანდიდატურების შერჩევის მიზნით კონკურსის გამოცხადება
უზენაესი სასამართლოს მოსამართლეობის კანდიდატთა შერჩევის მიზნით, იუსტიციის უმაღლესი საბჭო აცხადებს კონკურსს საქართველოს ოფიციალური ბეჭდვითი ორგანოს მეშვეობით. კონკურსი ცხადდება ერთ ან რამდენიმე ვაკანტურ ადგილზე კონკრეტული სპეციალიზაციების (სისხლის სამართალი, სამოქალაქო სამართალი, ადმინისტრაციული სამართალი) მიხედვით.
- ინტერესთა კონფლიქტის თავიდან აცილება
უზენაესი სასამართლოს მოსამართლეობის კანდიდატი არ შეიძლება იყოს იუსტიციის უმაღლესი საბჭოს მოქმედი წევრი.
პროექტის ერთ-ერთ უმთავრეს მიზანს წარმოადგენს შესაძლო ინტერესთა კონფლიქტის თავიდან აცილება, რაც, თავის მხრივ, კანდიდატთა შერჩევის პროცესის სანდოობისაკენ არის მიმართული.
პროცესის მიუკერძოებლად წარმართვის მიზნით, საბჭოს მოქმედ წევრს არ უნდა ჰქონდეს უფლება, მონაწილეობა მიიღოს უზენაესი სასამართლოს მოსამართლეობის შესარჩევ კონკურსში, რათა თავიდან იქნეს აცილებული შესაძლო ინტერესთა კონფლიქტი.
- გასაუბრების ღიად ჩატარება
კანდიდატთან გასაუბრება უნდა ჩატარდეს საჯაროდ. იუსტიციის უმაღლესი საბჭომ უნდა უზრუნველყოს გასაუბრების ტრანსლაცია საკომუნიკაციო საშუალებების გამოყენებით. საკონსულტაციო ჯგუფის წევრებს უფლება აქვთ, დაესწრონ კანდიდატთან გასაუბრების პროცესს და დაუსვან კანდიდატს შეკითხვა.
- გადაწყვეტილების კონსენსუსით მიღება
იუსტიციის უმაღლესი საბჭო საქართველოს პარლამენტისათვის კანდიდატების წარდგენის შესახებ გადაწყვეტილებას იღებს კონსესუსით, ღია სხდომაზე.
კონსენსუსი ყველაზე კარგ საშუალებას წარმოადგენს, რათა მიღწეულ იქნას შეთანხმება ისეთ კანდიდატზე, რომელიც ობიექტურად დააკმაყოფილებს საქართველოს უზენაესი სასამართლოს მოსამართლეობის მაღალ პროფესიულ და მორალურ სტანდარტს.
