ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი დავით სერგეენკო ტელეკომპანია „იმედის“ ეთერში“ შპს "სისხლის ბანკის" განცხადებას გამოეხმაურა.
„როდესაც სისხლის ბანკი ცდილობს, რომ უბედური შემთხვევა საკუთარი მარკეტინგისთვის გამოიყენოს, მოიზიდოს უფასო დონორები და დაამზადოს პროდუქტი, რომელიც შემდგომ კომერციულად უნდა გაყიდოს, ამ ფაქტის შეფასებას საზოგადოებას შევთავაზებ“,- განაცხადა დავით სერგეენკომ.
დღეს შპს „სისხლის ბანკმა“ მოსახლეობას მიმართა სისხლი გაიღონ, რადგან დიდ დიღომში მომხდარი ტრაგედიის შემდეგ მათ სისხლის კომპონენტებით უზრუნველყვეს როგორც იაშვილში გადაყვანილი ბავშვები, ასვე სხვა კლინიკის პაციენტები, რის გამოც ახლა სისხლის მარაგის რაოდენობა მინიმუმია.
„გუშინ საღამოს კლინიკებს მიმართა 8 პაციენტმა, კერძოდ იაშვილის კლინიკაში იყო 7 დაშავებული ბავშვი, ამ ბავშვების მკურნალობის პროცესში დაიხარჯა 1 ერთეული სისხლის პროდუქტი, ძალიან ცოტა, ამაზე ნაკლები მოცულობა უბრალოდ არ არსებობს, რომელიც რა თქმა უნდა შეფერხების გარეშე მიეწოდა კლინიკას და მათ თავისი მარაგიც აქვთ“,- განმარტა მინისტრმა.
„წუხელ დაკმაყოფილდა, დღეს დილასაც გადაესხა ბავშვს კონკრეტული სისხლის ჯგუფი, მაგრამ შეიძლება შეიქმნას დეფიციტი, ამიტომ ყოველთვის მოვუწოდებთ ჩვენ მოსახლეობას რომ გამოიჩინონ ყურადღება და გაიღონ სისხლი არამარტო ბავშვებისათვის, ნებისმიერი პაციენტისათვის. ეს პრობლემა დგას, მოსახლოების აქტიურობა არის ძალიან დაბალი და ყველას ვთხოვთ“,- განაცხადა „რუსთავი 2-ის“ ეთერში შპს „სისხლის ბანკის“ დირექტორმა დავით ლოლიაშვილმა.