ევროპის საბჭომ ოთხოზორია-ტატუნაშვილის სიას მხარი დაუჭირა. ევროსაბჭოს საპარლამენტო ასამბლეაზე ინიციატიავა საპარლამენტო უმცირესობის ლიდერმა, დავით ბაქრაძემ წარადგინა.
ოთხოზორია-ტატუნაშვილის სია, რომელიც ევროსაბჭოს საპარლამენტო ასამბლეის რეზოლუციაში შევიდა, მიზანმიმართული სანქციებით დაუსჯელობის წინააღმდეგ ბრძოლას ეხება.
„საერთაშორისო სამართლებრივი ზომებისა და სანქციების გამოყენებით მშვიდობიანი მოსახლეობის გატაცებაში, წამებასა და მკვლელობაში ბრალდებული პირები ვერ უნდა ახერხებდნენ თავისუფლად გადაადგილებას. ევროპარლამენტის და აშშ-ს კონგრესის შემდეგ უკვე ევროსაბჭომ მიიღო რეზოლუცია, რომელშიც მხარდაჭერილია ოთხოზორია-ტატუნაშვილის სია და მხარდაჭერილია ყველა საერთაშორისო სანქცია.
„ევროპული საქართველო“ გააგრძელებს მუშაობას ამ სიის კიდევ უფრო მეტი საერთაშორისო მხარდაჭერისთვის. ყველა დამნაშავე უნდა წარდგეს სასამართლოს წინაშე და უნდა დაისაჯოს.
მოვუწოდებთ საქართველოს ხელისუფლებას, მეტი სერიოზულობით და პასუხისმგებლობით მოეკიდოს ამ თემას მათ შორის ქვეყნის შიგნით და გადახედონ ოთხოზორია - ტატუნაშვილის სიას, დაამატონ ყველა ის პირი, ვინც პასუხისმგებელია ადამიანის უფლებების დარღვევასა და დანაშაულის დაფარვაში“, - ნათქვამია „ევროპული საქართველოს“ განცხადებაში, რომელიც ევროსაბჭოს მიერ ოთხოზორია-ტატუნაშვილის სიის მხარდაჭერას ეხება.
საქართველოს პარლამენტმა რუსეთის ფედერაციის მიერ ოკუპირებულ აფხაზეთსა და ცხინვალის რეგიონში ადამიანის უფლებების უხეში დარღვევისა და ოთხოზორია-ტატუნაშვილის სიის შესახებ რეზოლუცია 2018 წლის 21 მარტს 106 ხმით დაამტკიცა.
რეზოლუციის პროექტი საპარლამენტო უმრავლესობამ და უმცირესობამ შეთანხმებულად წარადგინეს კენჭისყრაზე.
26 ივნისს პრემიერ-მინისტრმა, მამუკა ბახტაძემ განაცხადა, რომ ე.წ. ტატუნაშვილი-ოთხოზორიას სიაში 33 პირი შეიყვანეს.
