საქართველოს ჭიდაობის ეროვნულ ფედერაციასთან გეგა გეგეშიძის მხარდასაჭერი აქცია იმართება. მოჭიდავეები ძალადობის მუხლით დაკავებულ ფედერაციის პრეზიდენტს სოლიდარობას უცხადებენ.
„ჩვენ არაფერს არ ვითხოვთ, ჩვენ ვთხოვთ ხელისუფლებას, რომ დროულად იქნეს ყველაფერი დადგენილი, რომ ფედერაციამ გააგრძელოს მუშაობა და ის წარმატებები, რომელიც გვქონდა აქამდე, გავაგრძელოთ, დღევანდელი შეკრებით ჩვენ მხარდაჭერას ვუცხადებთ ჩვენს პრეზიდენტს, გეგა გეგეშიძეს, თითოეული სპორტსმენი აქ თავისი სურვილით ჩამოვიდა და მხარდაჭერას უცხადებს ჩვენს პრეზიდენტს“, - განაცხადა თავისუფალი სტილით მოჭიდავეთა ნაკრების მთავარმა მწვრთნელმა გიორგი იანტბელიძემ
შინაგან საქმეთა სამინსიტრომ, საქართველოს ჭიდაობის ფედერაციის პრეზიდენტი თამაზ (გეგა) გეგეშიძე, სპორტის სასახლეში მომხდარ ფაქტთან დაკავშირებით, სისხლის სამართლის კოდექსის 126-ე მუხლის 1-ლი ნაწილით დააკავა, რაც ძალადობას გულისხმობს.
„შინაგან საქმეთა სამინისტრომ, საქმის ფაქტობრივი გარემოებების დასადგენად აქტიური საგამოძიებო მოქმედებები ჩაატარა. ასევე, ინფორმაციის ნებაყოფლობით მოწოდებაზე უარის თქმის გამო, კონფლიქტის შემსწრე პირები დაიკითხნენ მაგისტრატ მოსამართლესთან. გამოძიებით დადგინდა, რომ მიმდინარე წლის 11 იანვარს, სპორტის სასახლეში მომხდარი დაპირისპირებისას, თამაზ გეგეშიძემ ფიზიკური შეურაცხყოფა მიაყენა სპორტსმენ ზურაბ დათუნაშვილს. შინაგან საქმეთა სამინისტროში სპორტის სასახლეში მომხდარ ფაქტთან დაკავშირებით, გამოძიება საქართველოს სისხლის სამართლის კოდექსის 126-ე და 239-ე მუხლებით გრძელდება", - ნათქვამია განცხადებაში.