„ქართული ოცნების" ოფისში საპარლამენტო უმრავლესობის წევრები პარტიის თავმჯდომარეს, ბიძინა ივანიშვილს ხვდებიან. უმრავლესობის წევრის, ლევან გოგიჩაიშვილის თქმით, პირველ რიგში შეეცდებიან, დაარწმუნონ კოლეგები, რომ ღირსეულად დანიშნული მოსამართლეები ქვეყნისთვის ძალიან მნიშვნელოვანია.
„ჩვენ გვჭირდება მოსამართლეები, მაღალი ზნეობის მატარებელი ადამიანები, თითით საჩვენებელი ადამიანები, რომელთა ზნეობრივი კრიტერიუმი და მორალური მხარე იქნება აბსოლუტურად დამაკმაყოფილებელი უზენაესი სასამართლოს მოსამართლეობის წევრობისთვის, რასაც ვერ აკმაყოფილებენ ეს ადამიანები, რომლებიც იყვნენ წარმოდგენილნი.
ის, რომ მერე რა, ჩინჩალაძე გავიდეს მოსამართლედ, არის აბსოლუტურად მიუღებელი მსჯელობა. ეს არის კონფლიქტი იმ ამომრჩევლის დაკვეთასთან, 2012 წლის 1 ოქტომბრის დაკვეთასთან, რომლის მემკვიდრეობაც არის დღევანდელი პარლამენტი. ეს საკითხი არის წყალგამოყოფი, პირდაპირი მნიშვნელობით“, - განაცხადა გოგიჩაიშვილმა.
შეკითხვაზე, ელოდება თუ არა, რომ დაატოვებინებენ უმრავლესობის რიგებს, გოგიჩაიშვილმა განაცხადა, რომ, მისი აზრით, ეს საკითხი დღის წესრიგში არ დგას.
