„კოალიცია დამოუკიდებელი და გამჭვირვალე მართლმსაჯულებისთვის“ შემავალი ორგანიზაციები უზენაესი სასამართლოს მოსამართლეთა შესარჩევ სამუშაო ჯგუფში არ შევლენ და პარლამენტს მიმართავენ, არსებითად გადახედოს შექმნილ ფორმატს და ჯგუფის შემადგენლობას,- ამის შესახებ პრესკონფერენციაზე კოალიციის წარმომადგენლებმა განაცხადეს.
როგორც პრესკონფერენციაზე ითქვა, კოალიციაში შემავალი ორგანიზაციები აქტიურად გააგრძელებენ მუშაობას იმისთვის, რომ თანამდებობები დატოვონ იუსტიციის უმაღლესი საბჭოს იმ წევრებმა, რომლებმაც აქტიური მონაწილეობა მიიღეს უზენაესი სასამართლოს მოსამართლეთა სიის ნომინირებაში. მათივე თქმით, სამუშაო ჯგუფს, რომელიც უზენაესი სასამართლოს მოსამართლეთა შესარჩევად შეიქმნა, საზოგადოების ნდობა არ ექნება, რის გამოც მათი მხრიდან ამ ჯგუფში მათივე მონაწილეობის აუცილებლობას ვერ ხედავენ.
არსებული შემადგენლობით ჯგუფის შენარჩუნება გამორიცხავს რეალურ ცვლილებებზე მსჯელობას და მოემსახურება მხოლოდ პროცესის კოსმეტიკურ შელამაზებას. ამის გათვალისწინებით, კოალიცია უარს ამბობს სამუშაო ჯგუფში მონაწილეობაზე და მიმართავს პარლამენტს არსებითად გადახედოს შექმნილ ფორმატს და ჯგუფის შემადგენლობას.
რაც შეეხება კოალიციის მიერ წარდგენილი წინადადებებს, მიგვაჩნია, რომ უზენაეს სასამართლოში მოსამართლეთა. არჩევის პროცესი სამ ძირითად პრინციპს უნდა ეყრდნობოდეს:
▪ დამსახურებაზე დაფუძნებული მიდგომის უზრუნველყოფა;
▪ არჩევის პროცესის გამჭვირვალობა და ღიაობა;
▪ პროცესის ობიექტურად და მიუკერძოებლად წარმართვა", - აცხადებენ კოალიციაში შემავალი არასამთავრობო ორგანიზაციის წევრები.
