სასტუმრო „ბუდაპეშტის" მფლობელმა, გოგა ზაქაიძემ თბილისის მერ კახა კალაძესთან შეხვედრის შემდეგ განაცხადა, რომ ვაკის პარკში მშენებლობის საკითხზე მოლაპარაკება დასრულდა. 

„ჩვენმა კომპანიამ მიიღო გადაწყვეტილება, რომ დავთანხმდეთ ადგილის ჩანაცვლებაზე ან გამოსყიდვაზე", - ამბობს ზაქაიძე, თუმცა ბიზნესმენი კონკრეტულ თანხას არ ასახელებს. 

მისი თქმით, კომპანიისთვის 6 წლის განმავლობაში ამ პროცესში მონაწილეობა რთული იყო. იგი მადლობას უხდის მერიას იმისათვის, რომ დაძაბულობისა და დაპირისპირების ფონზე შემხვედრ წინადადებაზე წამოვიდა. 

„მოვილაპარაკეთ იმაზე, რომ კონკრეტულ ობიექტებზე შევთანხმდებით. ჩვენ გვაქვს ალტერნატივა და აქედან ამოვარჩევთ რომელიც გვაწყობს", - ამბობს ზაქაიძე. 

ბიზნესმენთან შეხვედრის შემდეგ კალაძემ განაცხადა, რომ ამ კონკრეტულ ადგილზე არაფერი არ აშენდება. „კონკრეტულად გეტყვით, რომ ვაკის პარკმა გაიმარჯვა", - ამბობს კალაძე.