ხვალ, 29 იანვარს, ორგანიზაცია „სამოქალაქო მოძრაობის" ლიდერი ალეკო ელისაშვილი ყაზტრანსგაზ თბილისის გენერალური დირექტორის გადადგომის მოთხოვნით „ყაზტრანსგაზ თბილისის" ოფისთან აქციას აანონსებს. ელისაშვილი მოქალაქეებზე 13:00 საათისთვის შეკრებისკენ მოუწოდებს.

„სასწრაფოდ დატოვოს მამუკა კობახიძემ „ყაზტრანსგაზ თბილისის“ გენერალური დირექტორის პოზიცია, რომელიც ამავდროულად ქალაქის სატრანსპორტო კომპანიის ხელმძღვანელია! სწორედ მისი მფარველების ჭარბი ძალაუფლების, გავლენებისა და გამეფებული დაუსჯელობის სინდრომის შედეგია, ამდენი განადგურებული სიცოცხლე და ოჯახი...

სასწრაფოდ უნდა შეიქმნას „ყაზტრანსგაზ თბილისთან“ არსებული საზოგადოებრივი საბჭო, რომელიც ანგარიშვალდებული იქნება მოსახლეობის წინაშე, რათა ოპერატიულად და ეფექტიანად გააცნოს ყველა მოქალაქეს კომპანიის სამუშაო გეგმა მოსახლეობის უსაფრთხოების მიზნით. საბჭო უნდა დაკომპლექტდეს დარგის რეალური სპეციალისტებითა და ექსპერტებით, ასევე მაღალი ნდობის მქონე იმ პირებით, რომელთა რეპუტაცია ხალხის გულწრფელ პატივისცემას იმსახურებს" - ნათქვამია ორგანიზაციის განცხადებაში. 

16 იანვარს, დიდ დიღომში, ავთანდილის ქუჩაზე საცხოვრებელ კორპუსში მომხდარი აფეთქების შედეგად 4 ადამიანი დაიღუპა, აქედან ერთი მცირეწლოვანი ბავშვია.

აფეთქების საქმეზე  „ყაზტრანსგაზ-თბილისის“ ყოფილ ორ თანამშრომელს, თორნიკე ტატიშვილსა და ვაზელ მამადიანს აღკვეთის ღონისძიებად პატიმრობა შეეფარდათ.