თბილისში მსოფლიო საპატრიარქოს დელეგაცია იმყოფება. დელეგაციის წევრები საპატრიარქოში შეხვედრებს მართავენ.
საპატრიარქოს პრესცენტრის წარმომადგენლის, ანდრია ჯაღმაიძის თქმით, ერთ-ერთი მთავარი განხილვის საკითხი იქნება უკრაინის ავტოკეფალია. მისი თქმით, არ უნდა ვიფიქროთ, რომ ასეთი ვიზიტით სინოდის ყველა წევრი ერთ აზრზე დადგება. როგორც მან აღნიშნა, უკრაინის ავტოკეფალიაზე საქართველოს საპატრიარქოს პოზიცია სინოდის სხდომის შემდეგ გახდება ცნობილი.
„უკრაინის საკითხზე იქნება საუბარი. ჩვენ ვხედავთ, რომ ძალიან დიდი ინტერესია უკრაინის ავტოკეფალიის გარშემო მიმდინარე მოვლენებზე და ბუნებრივია, რომ ამ საკითხზე იმჯელებენ. სწორად უნდა გვესმოდეს, რას ნიშნავს ავტოკეფალიური ეკლესია. ავტოკეფალიური ეკლესია არის დამოუკიდებელი ეკლესია, რომელიც თავად იღებს გადაწყვეტილებას და ეს გადაწყვეტილება სინოდალური შეხვედრის შემდეგ უნდა მივიღოთ. რა თქმა უნდა, ამ ვიზიტს აქვს ძალიან დიდი მნიშვნელობა, მაგრამ არ უნდა ვიფიქროთ, რომ ასეთი ვიზიტებით სინოდის ყველა წევრი ერთ აზრზე დადგეს. ეს ასე არ იქნება და ჩვენ მაინც უნდა დაველოდოთ სინოდზე მსჯელობას“, - განაცხადა ჯაღმაიძემ.
