საქართველოს პარლამენტის წევრი გედევან ფოფხაძე მიიჩნევს, რომ ოპოზიციას ნაკლებად ჰქოდა ეკა ბესელიას პირადი ცხოვრების ამსახველი ვიდეოჩანაწერების გავრცელების მოტივაცია.
„თუ ვინმე კატეგორიულად ამბობს, ვისგან მოდის, იმან უნდა მტკიცებულებებიც წარმოადგინოს იმიტომ, რომ ახლა მე როგორ დავადო ვინმეს ხელი, მტკიცებულებების გარეშე.
მე ერთადერთი, რაც შემიძლია, ფარულ ჩანაწერებზე გითხრათ, მგონია, რომ მოტივაცია პოლიტიკურ ოპოზიციას ეკა ბესელიას საწინააღმდეგოდ, რომ ახლა რამე გაევრცელებინა, მით უმეტეს, ნაციონალურ მოძრაობას, ჩემი აზრით, ნაკლებად ჰქონდათ, იმიტომ რომ ეს ჩანაწერები მათ ჰქონდათ, ეს მათი შექმნილია.
ეკა ბესელიამ პოლიტიკურ ოპოზიციას იმდენი უხერხულობა და პრობლემები შეუქმნა, იმდენჯერ გაამწარა, რომ თუ აპირებდნენ, აქამდეც გაავრცელებდნენ.
მე მგონია, რომ ეს საკითხი უკავშირდება მის პოზიციას სასამართლო სისტემასთან დაკავშირებით, მაგრამ ხელს ვერავის დავადებ. ასეთი მორალის ადამიანი, რომელიც ჩანაწერებს გაავრცელებდა, მე მგონია, რომ მოსამართლეებშიც რთულად მოიძებნება, თუმცა, ვინც გაავრცელა, იმის მოტივაცია სწორედ ეს იყო“, - განაცხადა გედევან ფოფხაძემ.
ფარული ჩანაწერების შენახვისა და გავრცელების ბრალდებით გუშინ პოლიციამ 17 ადამიანი დააკავა. „ნაციონალურ მოძრაობაში“ კი განაცხადეს, რომ ხელისუფლება ჩანაწერის გავრცელების დაბრალებას ოპოზიციისთვის ცდილობს.
„არავინ დაიჯერებს, რომ პირადი ცხოვრების ამსახველი კადრები ბიძინა ივანიშვილის უშუალო მითითების გარეშე გავრცელდა. სუს-მა შემდგომ ეს კადრები ვირუსულად ათობით ჩვენს მხარდამჭერსა და მთელი საქართველოს მასშტაბით ბევრ ადამიანს გაუგზავნა, რადგან ხვდებოდნენ, რომ ვინმე უნდა დაესაჯათ“, - თქვა „ნაციონალური მოძრაობის“ წევრმა თინა ბოკუჩავამ.
