საუდის არაბეთმა და მისი კოალიციის პარტნიორებმა ამერიკული იარაღი ალ ყაიდასთან აფილირებულ მებრძოლებს გადასცეს, რითაც აშშ-სთან დადებული შეთანხმება დაირღვა. CNN-ის გამოძიებით დგინდება, რომ ამერიკული იარაღი ირანის მიერ მხარდაჭერილი მებრძოლების ხელშიც აღმოჩნდა, რომლებიც კოალიციას იემენზე კონტროლის დამყარებისთვის ებრძვიან.
„ამერიკული სამხედრო ტექნოლოგიის გამოაშკარავებით კონფლიქტის ზონაში მყოფი ამერიკელი ჯარისკაცების სიცოცხლეს საფრთხე ექმნება" - წერს გამოცემა.
ანალიტიკოსები CNN-თან საუბარში აცხადებენ, რომ საუდის არაბეთი და ომში მისი მთავარი მოკავშირე, გაერთიანებული ემირატები ამერიკის მიერ წარმოებულ იარაღს ვალუტად იყენებდნენ ადგილობრივი მილიციისა და დაჯგუფებების მოსასყიდად და პოლიტიკურ ლანდშაფტზე გავლენის მოსახდენად.
აშშ-ის თავდაცვის დეპარტამენტის განცხადებით, ამ სამხედრო ტექნოლოგიების მესამე მხარისთვის გადაცემით, კოალიცია აშშ-სთან დადებულ შეთანხმებას არღვევს.