„ვისურვებდი, რომ ღირსეული სასულიერო პირების რიგი დადგეს მატროსოვის ციხესთან. დღემდე არათუ ზიარება სასულიერო პირებს არ უშვებდნენ მასთან”, - განაცხადა ჭყონდიდის მიტროპოლიტმა პეტრემ ტელეკომპანია „პირველის“ ეთარში, სადაც საპატრიარქოს დღევანდელ გადაწყვეტილებას გამოეხმაურა, რომლის მიხედვითაც, საკუთარი პასუხისმგებლობის ფარგლებში, მღვდელმსახურებს დეკანოზ გიორგი მამალაძის ზიარების უფლება მიეცათ.
საპატრიარქომ დღეს განცხადება გაავრცელა, სადაც ნათქვამია, რომ თორნიკე მამალაძის მიერ საპატრიარქოს მიმდებარე ტერიტორიაზე კარვის დადგმამ მოთხოვნით, რომ მისი ძმა გიორგი მამალაძე აზიარონ ეკლესიაზე ზეწოლის სახე შესძინა. მათი თქმით, პატრიარქმა მიიღო გადაწყვეტილება, რომ ნებისმიერ მღვდელმსახურს, რომელსაც მიაჩნია, აღნიშნული პიროვნების ზიარება არის შესაძლებელი, შეუძლია ეს განახორციელოს, თუმცა ეს იქნება ამ სასულიერო პირის პირადი გადაწყვეტილება და პირადი პასუხისმგებლობა.
