მთავარ პროკურატურაში ზაზა სარალიძისა და გენერალური პროკურორის შეხვედრა დასრულდა. ზაზა სარალიძის თქმით, შალვა თადუმაძესთან შეხვედრით კმაყოფილი არ არის, რადგან ბევრი შეკითხვა დასვა, რომელზეც პასუხები ისევ ვერ მიიღო.
ხორავას ქუჩაზე მოკლული დავით სარალიძის მამა მიიჩნევს, რომ გენერალურ პროკურორს, როგორც ჩანს, არასწორ ინფორმაციას აწვდიან და წინა კვირას გამართული შეხვედრის შემდეგ ამ საქმეზე წინსვლა არ შეიმჩნევა.
„ფაქტია, საქმის პროკურორები მაქსიმალურად ცდილობენ ამ საქმიდან მიხეილ კალანდიას გამოყვანას“, - განაცხადა სარალიძემ. მისი თქმით, ბრძოლის გაგრძელებას გეგმავს ამ საქმეში მონაწილე ყველა პირისა და იმ ადამიანების პასუხისგებაში მიცემამდე, ვინც საქმის მსვლელობაში უხეშად ჩაერია.
„მივიღე იმის პირობა, რომ დაწყებულია მოკვლევა პროკურორებისა და გამომძიებლების მხრიდან სამსახურებრივ გადაცდომებზე და ვნახოთ, რა პასუხს მივიღებთ უმოკლეს ხანში“, - თქვა სარალიძემ. ის გენერალურ პროკურორთან კიდევ ერთ შეხვედრას სააპელაციო სასამართლოში განხილვის დასრულების შემდეგ გეგმავს.
ზაზა სარალიძის ინტერესების დამცველი ადვოკატის, ნესტან ლონდარიძის თქმით, მათ შეხვედრაზე დასვეს ის საკითხები, რომელთან განხილვაც მნიშვნელოვანია. ლონდარიძის თქმით, ის ორშაბათიდან შეუდგება ხორავას ქუჩაზე გამოყოფილი საქმის მასალების გაცნობას, რომელშიც ამ საქმეზე დაწყებული ხელახალი გამოძიება იგულისხმება. მისი თქმით, პრიორიტეტული სწორედ ეს გამოყოფილი საქმეა.
„ჩვენ დავაფიქსირეთ ყველა ის დარღვევა, რომლებსაც თვალს ვადევნებთ სააპელაციო სასამართლოს მსვლელობისას. ეს შეეხება მოწმეთა დაკითხვის მეთოდებსა თუ დასმულ კითხვებს. ამასთანავე განსაკუთრებით მნიშვნელოვანია, რომ გენერალურმა პროკურორმა გამოყოფილი საქმის მასალების ჩვენთვის სასურველ ფორმატში გაცნობა შემოგვთავაზა“, - განაცხადა ნესტან ლონდარიძემ.
ნესტან ლონდარიძის თქმით, შეხვედრაზე ისაუბრეს იმ საკითხებზეც, რომელზეც ვერ თანხმდებოდნენ და ეს უთანხმოება ისევ დარჩა. ხოლო სარალიძის მოთხოვნაა, რომ სააპელაციო სასამართლოს განხილვაზე მეტად გამოყოფილ საქმეზე მოხდეს რეაგირება.
„პროკურატურამ უნდა დაგვარწმუნოს იმ ორი პირის ბრალეულობა, რომლებსაც აქვთ წარდგენილი ბრალი და ამასთანავე იმსჯელოს საქმეში დამატებით პირთა მონაწილეობაზე“, - დასძენს ლონდარიძე.
