პარლამენტის პირველი ვიცე-სპიკერი თამარ ჩუგოშვილი მოსამართლეთა უვადოდ დანიშვნის საკითხის შეჩერების საკითხზე მიმდინარე დისკუსიასა და ამავე თემაზე მომზადებულ კანონპროექტს გამოეხმაურა. 

„ორი პარალელური პროცესია ძალიან მნიშვნელოვანი. ერთია უზენაესი სასამართლოს მოსამართლეების შერჩევა და იცით, რომ პროცესი მიმდინარეობს, პარლამენტი კანონპროექტს წერს. მეორეა, სხვა მოსამართლეების დანიშვნა. როგორც პრობაციაზე (გამოსაცდელი ვადით) დანიშვნა, ასევე უვადოდ გამწესება. ეს კანონი დიდი ხანია, დასახვეწია, თემებზე მუშაობა გაიწელა. პარლამენტში სამუშაო ჯგუფი იყო შექმნილი, რომელსაც შედეგების დადება გაეწელა. დაუყოვნებლივ, დროულად უნდა მოხდეს კანონების მიღება და ჩვენი პოლიტიკური ძალა პასუხისმგებლობას იღებს, რომ როგორც უზენაესი სასამართლოს მოსამართლეების შესარჩევი, ასევე, სხვა მოსამართლეების დანიშვნის, დისციპლინური პასუხისმგებლობა-საქმიანობის წესების დარეგულირების თაობაზე. კანონპროექტები ყოველგვარი გადადებისა და დაბრკოლების გარეშე იქნება მიღებული. დაბრკოლება რომ არ ყოფილიყო, საქმე არ გამწვავდებოდა“, – განაცხადა თამარ ჩუგოშვილმა.

ჩუგოშვილის აზრით, სასამართლო რეფორმის ე.წ. მეოთხე ფაზა დაუყონებლივ უნდა დაიწყოს და ეს იმ პრობლემებს გაასწორებს, რაც საზოგადოებას აწუხებს.

„კარგი იქნება, თუ იუსტიციის საბჭო უვადოდ დანიშვნას შეაჩერებს და ასეთ გადაწყვეტილებას მიიღებს, ვიდრე პარლამენტის მხრიდან საგაზაფხულო სესიის დასრულებამდე კანონპროექტები მიღებული არ იქნება. როგორც კი კანონპროექტებს მივიღებთ და ვენეციის კომისიასთან პროცედურებს გავასწორებთ, ყველანაირი კითხვები მოსამართლეთა დანიშვნასა და იუსტიციის საბჭოს საქმიანობაზე მოიხსნება. შესაბამისად, შეგვეძლება, მოსამართლეთა განწესების თაობაზე მშვიდად ვიყოთ. კარგი იქნება, თუ საბჭოს მხრიდან დანიშვნა შეჩერება, რომ ამან ზედმეტი ვნებათაღელვა არ გამოიწვიოს. ეს გადაწყვეტილება თავად უნდა მიიღოს, ვერ დავავალებთ. ორი კონსტიტუციური ორგანო ვართ და როცა ურთიერთობა გამწვავებულია ასე და ჩანს, საკითხებმა რამხელა დაპირისპირება გამოიწვია. ნორმალური თანამშრომლობა იქნებოდა, რომ იუსტიციის საბჭოს თუ ისეთი მოსამართლეები არ ჰყავს, რომელთაც სამწლიანი ვადა ეწურებათ და მათი კანდიდატურა აუცილებლად განსახილველია, პარლამენტის მხრიდან კანონპროექტის მიღებას დაელოდონ და ეს იქნებოდა სწორი. ეს პარლამენტსა და სასამართლოს ჯანსაღი კომუნიკაციის ჩამოყალიბებაში დაეხმარებოდა, რადგან მათი მხრიდან ხისტმა დამოკიდებულებებმა, სიის წარმოდგენამ ყველა საკმაოდ მძიმე ვითარებამდე მიგვიყვანა“, – განაცხადა ჩუგოშვილმა.

ჩუგოშვილის კომენტარს 1tv.ge ავრცელებს.