ფრაქცია „ქართული ოცნება - სოციალ-დემოკრატების“ თავმჯდომარის მოადგილე ბექა ნაცვლიშვილი დღეს, სავარაუდოდ, უმრავლესობას დატოვებს. მისი თქმით, ხელისუფლების მიერ შემუშავებული საპენსიო სისტემა გარკვეულწილად წინა ხელისუფლების იდეოლოგიას ეფუძნებას, რასაც ის დიდი ხნის განმავლობაში ებრძოდა.
„მე ვიცი, რომ ბოლოჯერ შევდივარ. იმიტომ, რომ დავინახე განწყობები, დავინახე ჩემი კოლეგების განცხადებები ჩემს საპენსიო სისტემასთან დაკავშირებით. ამ შემთხვევაში, მე ვეცდები, სხდომათა დარბაზში დღეს ჩემს კოლეგებსაც მივმართო, მაგრამ უფრო მივმართავ საზოგადოებას.
იმიტომ, რომ ეს საპენსიო სისტემა ზოგადად და ეს მსოფლმხედველობა ეფუძნება გარკვეული თვალსაზრისით იმას, რასაც მე ამდენი ხნის განმავლობაში ვებრძოდი. ჩვენ, როგორც ჩანს, ვერ გავათვითცნობიერეთ, რას ეფუძნებოდა წინა ხელისუფლების იდეოლოგია და შესაბამისად, გავაგრძელეთ გარკვეული თვალსაზრისით ის ეკონომიკური და სოციალური პოლიტიკა“, - განაცხადა ბექა ნაცვლიშვილმა.
„ქართული ოცნება - სოციალ-დემოკრატების“ თავმჯდომარის მოადგილემ პარლამენტს საპენსიო რეფორმის ალტერნატიული ვარიანტი წარუდგინა, რომელიც მისი თქმით, თაობათა სოლიდარობაზე არის დაფუძნებული. თუმცა, ნაცვლიშვილი მიიჩნევს, რომ უმრავლესობა მის ინიციატივას მხარს არ დაუჭერს და ამის შემდეგ ის მმართველ გუნდს დატოვებს.
