„ქართული ოცნების“ წევრმა ლევან გოგიჩაიშვილმა საპარლამენტო უმრავლესობა დატოვა. გოგიჩაიშვილმა თავის გადაწყვეტილებაზე პლენარული სხდომის შემდეგ განაცხადა, რომელზეც მისი, ეკა ბესელიას და კიდევ 7 დეპუტატის ინიციატივა ჩავარდა. კანონპროექტით მოსამართლეთა უვადოდ დანიშვნა 2024 წლამდე უნდა გადადებულიყო.

„უნდა დაგიდასტუროთ, რომ უმრავლესობის ფორმატში პარლამენტის ტრიბუნაზე ბოლო გამოსვლა მქონდა. ჩემთვის ზღვარი წაიშალა. ვშიშობდი, რომ ეს ზღვარი წაიშლებოდა. მორალური ზღვარი აღარ არსებობს. „ქართულმა ოცნებამ“ დღეს მორალური უპირატესობა დაკარგა, რადგან იმ ადამიანებს დაუჭირა მხარი, ვინც სააკაშვილს წლების განმავლობაში იურიდიულად უფორმებდნენ ყველაფერს, რასაც ის ქვეყნის წინააღმდეგ ჩადიოდა“, - განაცხადა გოგიჩაიშვილმა პლენარული სხდომის დასრულების შემდეგ ჟურნალისტებთან.

პარლამენტში ეკა ბესელიას და 8 დეპუტატის მიერ ინიცირებულ კანონპროექტს, პირველ და მეორე ინსტანციებში მოსამართლეთა უვადოდ დანიშვნის შეჩერების შესახებ 45-მა დეპუტატმა დაუჭირა მხარი, 17 კი წინააღმდეგი წავიდა. კანონპროექტის მისაღებად დეპუტატთა უმრავლესობის მხარდაჭერა იყო საჭირო.

ეკა ბესელიასა და კიდევ რვა დეპუტატის ინიციატივით, ცვლილებები უნდა შესულიყო „საერთო სასამართლოების შესახებ“ ორგანულ კანონში. ცვლილებებით, 2024 წლის 31 დეკემბრამდე საქალაქო და სააპელაციო სასამართლოებში მოსამართლეთა უვადოდ გამწესება უნდა შეჩერებულიყო.