გარემოს დაცვისა და ბუნებრივი რესურსების კომიტეტის თემატური მოკვლევის ჯგუფში საჯარო უწყებებს უსმენენ თბილისში ატმოსფერული ჰაერის მდგომარეობის შესახებ. დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ იმ ფაქტორებზე ისაუბრა, რაც ავადობის მთავარი გამომწვევია. მისი თქმით, ერთ-ერთი მნიშვნელოვანი ფაქტორი სწორედ გარემოა, კერძოდ ჰაერის დაბინძურების შედეგად გამოწვეული დაავადებები. 

„არაგადამდები დაავადებების გამოწვევის რისკ-ფაქტორებში ერთ-ერთი მთავარი გარემოა. მთლიანად თუ შევხედავთ, ადამიანების ავადობაში/სიკვდილიანობაში ერთ-ერთი წამყვანი არის სოციალურ-ეკონომიკური ფაქტორი,  დაახლოებით 50% დაკავშირებულია სწორედ ამ ფაქტორთან, 20-დან 25%-მდე მიზეზებში  გარემოს ფაქტორებია, შემდეგ მოდის გენეტიკური ფაქტორი დაახლოებით 17-18%, და შემდეგ 12-15% ჯადაცვის სიტემის ორგანიზაციის ფაქტორია. ამ ოთხი წამყვანი ფაქტორიდან, სამი მოდიფიცირებადია, ანუ ის შეგვიძლია შევცვალოთ. ჯერჯერობით, არაცვლადია გენეტიკური ფაქტორი. 

ზოგადად, გარემო ფაქტორი არის წამყვანი. გარემოში შედის ჰაერი, წყალი ნიადაგი, ქიმია. მსოფლიოში, გლობალური სტატისტიკით, ყოველწლიურად 58 მლნ ადამიანი კვდება სხვადასხვა დაავადებით. აქედან 8 მლნ სიკვდილის შემთხვევა გამოწვეულია ჰაერით. 

საქართველოს რაც შეეხება, 46-დან 48 ათასამდე ადამიანი კვდება ჩვენთან ყოველწლიურად.  11 ათასი სიკვდილის შემთხვევა ქვეყანაში პირდაპირ ან არაპირდაპირ ჰაერის ფაქტორთანაა დაკავშირებული.  ესაა დაახლოებით 20-21%.  ჰაერის დაბინძურება პირველ რიგში იწვევს ისეთ დაავადებას, როგორიცაა გულსისხლძარღვთა დაავადებები, ინსულტი და ა.შ. შემდეგ მოდის კიბო, დიაბეტი, ქრონიკული რესპირატორული დაავადებები", - განაცხადა ამირან გამყრელიძემ.