პარლამენტარი ნუკრი ქანთარია და განათლების კომიტეტის თავმჯდომარის მოადგილე გენადი მარგველაშვილი ზოგადი განათლების მიზნების დოკუმენტიდან სიტყვა „ლიბერალურის“ ამოღებას მოითხოვენ.

კონკრეტულად დეპუტატები ცვლილებებს მოითხოვენ ზოგადი განათლების მიზნების ჩამონათვალში იმ მუხლში, სადაც სიტყა „ლიბერალურია" ნახსენები. 

მოქმედი რედაქციით, აღნიშნული ჩანაწერი ასე გამოიყურება - „მოსწავლის გონებრივი და ფიზიკური უნარ- ჩვევების განვითარება, აუცილებელი ცოდნით უზრუნველყოფა, ცხოვრების ჯანსაღი წესის დამკვიდრება, ლიბერალურ-დემოკრატიულ ღირებულებებზე დამყარებული სამოქალაქო ცნობიერების ჩამოყალიბება, მოსწავლის მიერ კულტურულ ფასეულობათა პატივისცემა, ოჯახის, საზოგადოების, სახელმწიფოსა და გარემოს წინაშე უფლება-მოვალეობების გაცნობიერებაში ხელის შეწყობა“.

დეპუტატები კი პარლამენტს სთავაზობენ ასეთ ვერსიას - „ბ) მოსწავლის გონებრივი და ფიზიკური უნარ-ჩვევების განვითარება, აუცილებელი ცოდნით უზრუნველყოფა, ცხოვრების ჯანსაღ წესსა და დემოკრატიულ ღირებულებებზე დამყარებული სამოქალაქო ცნობიერების ჩამოყალიბება“;

დასაბუთებაში წერია, რომ ამ ცვლილებებით, ზოგადი განათლების შესახებ მიზნები „ბავშვის უფლებების შესახებ“ კონვენციის სულისკვეთებასა და მოთხოვნებთან მოვა თანხვედრაში. 

განმარტებითი ბარათი სრულად იხილეთ ამ ბმულზე.