პერსონალურ მონაცემთა დაცვის ინსპექტორის აპარატმა 2018 წლის ანგარიში გამოაქვეყნა. ანგარიში სხვა საკითხებთან ერთად შსს-ს შექმნილი ცენტრალური საინფორმაციო ბანკის არამიზნობრივ გამოყენებასაც ეხება. ანგარიშის მიხედვით, გამოვლინდა ამ მონაცემების არასამსახურებრივი მიზნით დამუშავების ცალკეული შემთხვევები, რასაც შსს-ს ერთ-ერთი თანამშრომლის სამსახურიდან გათავისუფლება მოჰყვა.
„საანგარიშო პერიოდში მოქალაქეთა მომართვის საფუძველზე ინსპექტორმა შეისწავლა მონაცემებზე წვდომის კანონიერების რამდენიმე შემთხვევა და შედეგად, გამოავლინა არასამსახურებრივი მიზნით წვდომისა და კანონით გათვალისწინებული საფუძვლის გარეშე მონაცემთა დამუშავების ცალკეული შემთხვევები.
ინსპექტორის მიმართვის საფუძველზე სამსახურებრივი მოკვლევის შედეგად სამინისტროს გენერალურმა ინსპექციამ დაადგინა, რომ ერთ-ერთმა თანამშრომელმა ცენტრალურ საინფორმაციო ბანკში არსებული მონაცემები გადაამოწმა არასამსახურებრივი მიზნით, რაც მკაცრ დისციპლინურ გადაცდომად მიიჩნიეს და თანამშრომელი სამსახურიდან გათავისუფლდა “, - ნათქვამია ანგარიშში.
ცენტრალური საინფორმაციო ბანკი შინაგან საქმეთა სამინისტრომ კანონმდებლობით დაკისრებული ფუნქცია-მოვალეობების ეფექტიანად შესრულებისთვის შექმნა. პერსონალურ მონაცემთა დაცვის ინსპექტორის მიხედვით, აქ თავმოყრილია მოცულობითი, მათ შორის განსაკუთრებული კატეგორიის, მონაცემები. სამინისტროს თანამშრომლებს მონაცემების მოპოვება, დამუშავება და გავრცელება არასამსახურებრივი მიზნებისთვის ეკრძალებათ.
