ვანისა და ბაღდათის მიტროპოლიტმა ანტონმა გიორგი მამალაძის მონახულების შემდეგ ჟურნალისტებთან განაცხადა, რომ ერთხელ და სამუდამოდ უნდა დასრულდეს ამ თემის ირგვლივ მითქმა-მოთქმა და მისი თქმით, საპატრიარქო მზად არის ყველაფრისთვის, რომ ნაბიჯი გადადგას შეწყალების მოთხოვნისთვის.
„საკითხი, მივიჩნევ, რომ აუცილებლად უნდა განვიხილოთ შიგნით. ჩვენ ამის რესურსიც გვაქვს და შესაძლებლობაც და ძალაც. ეს საკითხი, თუნდაც იმისთვის უნდა განვიხილოთ, რომ ერთხელ და სამუდამოდ დასრულდეს თემის ირგვლივ მითქმა-მოთქმა და სპეკულაციები. ეს არის შიდა საკითხები, რომელსაც ეკლესია განიხილავს. საპატრიარქო ყველაფრისთვის არის მზად, რომ ნაბიჯი გადადგას შეწყალების მოთხოვნისთვის. დეკანოზის პოზიცია არის ჯანსაღი. თქვენც იხილავთ მალე, რომ ჩვენ გადავდგამთ ისეთ ნაბიჯს, რომ დეკანოზი იქნება შეწყალებული და მოთხოვნა გაკეთდება. მე ვფიქრობ, რომ პრეზიდენტი გადადგამს ამ ნაბიჯს. დანარჩებს თქვენ იხილავთ. მსჯავრდებული თავად იტყვის დანარჩენ ყველაფერს. მართალია, მას არ უწყობს ჯანმრთელობა ხელს, თუმცა გამოჯანმრთელდება. ის, რომ საპატრიარქომ უთხრა უარი შეწყალებაზე, იყო არასწორი ინტერპრეტაცია. რა პასუხიც მამალაძისგან მივიღე, ამაზე შიგნით ვიმსჯელებთ. მე მიმაჩნია, რომ დეკანოზი უდანაშაულოა და პატრიარქის პოზიცია არის დადებითი", - განაცხადა მიტროპოლიტმა ანტონმა.
