ბოდბელი ეპისკოპოსი იაკობი „რუსთავი 2-სთვის“ მიცემულ ინტერვიუში აცხადებს, რომ გიორგი მამალაძის მიერ მღვდელმთავრებისთვის გაგზავნილი წერილი კონკრეტულ ფაქტებს არ შეიცავს.
“ეს ახალი წერილი არ არის. თუ ვინმე ამბობს არ ვიცი, რა წერია წერილშიო, იტყუებიან. როდესაც ერთ-ერთმა ეპისკოპოსმა წაგვიკითხა, იქვე დაიბადა აზრი, რომ ასეთი ადამიანი არ შეიძლება, სასულიერო პირი იყოსო. ერთია წერ, მაგრამ... მახარებელი ხომ არ არის, ხომ უნდა დაამტკიცო რასაც წერს, ყველაფერი დაუჯერო? შანტაჟია ჩვეულებრივი, თუ არ გამომიშვებენ, რაღაცები მაქვს და გამოვაქვეყნებ, გამოაქვეყნოს რაც უნდა”, – აცხადებს ბოდბელი ეპისკოპოსი იაკობი.
“არანაირი ფაქტები წერილში არ ყოფილა - ეს არის ჩვეულებრივი აგათა კრისტი. მართლა რომ სერიოზული კომპრომატები იყოს, აქამდე ხომ გამოიყენებდა? რომელ კომპრომატზეა ლაპარაკი? შეშინებული კაცია ციხეში. სასულიერო პირი არ უნდა იხვეწებოდეს, ციხიდან გამიშვიო. ზოგიერთი სასულიერო პირი მაგას მოწამეს უწოდებს. ჰოდა, თუ მოწამეა და აღმსარებელი, მაგის ჯვარს ტოვებს და გარბის? თუ შენდობას ითხოვს, ჩვენ გაგებით მოვეკიდებით, თუ მუქარით ილაპარაკა, გამოაქვეყნოს”, – აცხადებს ბოდბელი ეპისკოპოსი იაკობი.
