საქართველოში გაეროს ოფისთან საპროტესტო აქცია გაიმართა. გურამ ფალავანდიშვილი, დიმიტრი ლორთქიფანიძე, ლევან ჩაჩუა თანამოაზრეებთან ერთად შეიკრიბნენ. მათ ბავშვის უფლებათა კოდექსის პროექტის განხილვის შეჩერება და პარლამენტიდან მისი გაწვევა მოითხოვეს.
„შეწყდეს ოჯახის ნგრევის, გარყვნილებისა და მამათმავლობის კულტივირება საქართველოში, გაუქმდეს ბაღებში ნეიტრალური გენდერის პროგრამა, შეწყდეს ლგბტ ლობიზმი სპორტში, აიკრძალოს სკოლებში საგანი „მე და საზოგადოება“. აღიკვეთოს გაეროს ტრენინგები საზაფხულო ბანაკებში, რადგან ისინი ითრევს ბავშვებს ჰომოსექსუალიზმის მიმღებლობაში, შეწყდეს გაეროს მიერ მომზადებული ბავშვთა უფლებათა კოდექსის ინიცირება პარლამენტში, ვინაიდან ის ემსახურება ოჯახის დანგრევისა და ლგბტ ცნობიერების პროპაგანდას ბავშვებში“, - ნათქვამია ორგანიზაციის განცხადებაში.
მათი თქმით, კატეგორიულად მიუღებელია „იუნისეფის“ ის რეკომენდაციები, რომელზე დაყრდნობითაც ბავშვთა უფლებათა კოდექსის პროექტი მომზადდა. დიმიტრი ლორთქიფანიძის განცხადებით, კოდექსის პროექტში წარმოდგენილია გენდერული საკითხებისადმი მგრძნობელობის ამაღლების ნორმები და პარლამენტმა აღნიშნული კანონი არ უნდა მიიღოს.