„ელმავალმშენებელი“ ქარხნის თანამშრომლები სახელფასო დავალიანების გასტუმრებას მოითხოვენ. ამ წუთებში ქარხანასთან დასაქმებულების, საქართველოს პროფესიული კავშირების გაერთიანებისა და რკინიგზელთა ახალი პროფკავშირის საპროტესტო აქცია მიმდინარეობს.
პროფკავშირების ცნობით, „ელმავალმშენებელი“ ქარხნის თანამშრომლები სახელფასო დავალიანების გასტუმრებას მოითხოვენ, წინააღმდეგ შემთხვევაში კი, პერმანენტული აქციებით იმუქრებიან. საწარმოში დასაქმებულებს კუთვნილი ანაზღაურება უკვე ექვსი თვეა არ მიუღიათ.
„შეგახსენებთ ქარხნის ადმინისტრაციამ რკინიგზელთა ახალი პროფკავშირის ჩართულობით მედიაციაში მონაწილეობაზე და მოლაპარაკებათა მაგიდასთან დაჯდომაზე უარი განაცხადა და პროცესში რკინიგზელთა მეორე, ადმინისტრაციასთან შეკრული პროფკავშირის ჩართვა მოითხოვა.
▪ გარდა სოციალურად უპასუხიმგებლო დამსაქმებლებისა, რომლებიც ხელს უშლიან რეალურ პროფკავშირულ საქმიანობას, პრობლემად მიგვაჩნია სახელმწიფოს ჩართულობის სისუსტე. მედიატორმა ვერ მოახერხა მოლაპარაკებების პროცესის უზრუნველყოფა, რაც თავისმხირვ სისტემური პრობლემაა", – ვკითხულობთ პროფკავშირების გავრცელებულ ინფორმაციაში.
„ელმავალმშენებელი“ ქარხნის ადმინისტრაციის თქმით, კომპანიაში ნამდვილად რთული ვითარებაა ხელფასის გადახდასთან დაკავშირებით. მათი თქმით, არსებობს 5 თვის სახელფასო დავალიანება, თანამშრომელთა პრეტენზია ერთმნიშვნელოვნად კანონიერი და სამართლიანია. დავალიანება სრულად არის აღიარებული ქარხნის ადმინისტრაციის მიერ, ტაბელებში გათვალისწინებულია, დეკლარირებულია და მხოლოდ ფულად სახსრებს ელოდებიან მათ გასაცემად.
„დავალიანების წარმოშობა გამოწვეულია მცირე მოცულობის შეკვეთებით, რომლებიც ხარჯებს ვერ ფარავდა და კიდევ იმ გარემოებით, რომ არსებობს უცხოური კონტრაქტორი ორგანიზაცია, რომელსაც აქვს „ელმავალმშენებლის" მიმართ დებიტორული დავალიანება და სწორედ მისგან ველით დღესდღეობით საჭირო თანხის გადმორიცხვას. მარტის თვის განმავლობაში აღნიშნული პრობლემა გადაწყდება", - ნათქვამია მათ განცხადებაში.
