პრემიერ-მინისტრმა მამუკა ბახტაძემ დღეს გამართულ პრეზენტაციაზე განათლების ეროვნული კონცეფციის შესახებ ისაუბრა და განაცხადა, რომ ყოველწლიურად ეროვნული დოვლათის 6% განათლების მიმართულებით დაიხარჯება.

„წარმოგიდგენთ განათლების ეროვნულ კონცეფციას, რომლის ფარგლებშიც სახელმწიფო აიღებს უპრეცენდენტო ვალდებულებას, რომ ყოველწლიურად ჩვენი ეროვნული დოვლათის 6% ანუ დღეს არსებული ბიუჯეტის მეოთხედი წარმართოს განათლების სფეროს სრული ტრანსფორმაციის, მსოფლიოში ერთ-ერთი გამორჩეული და სამაგალითო განათლების ქართული სკოლის დასაფუძნებლად“,- განაცხადა პრემიერმა.

პრემიერ-მინისტრის განმარტებით განათლების სფეროში მიმართული დაფინანსება ყოველწლიურად გაიზრდება და მაქსიმუმს მიაღწევს 2022 წლისთვის, როცა მთლიანი შიდა პროდუქტის (მშპ) 6% შეადგენს, რაც ქვეყნის ბიუჯეტის მეოთხედია.

„ეს იქნება უზრუნველყოფილი სპეციალური კანონონმდებლობით - „საგანმანათლებლო თანასწორობის აქტით“, რომელიც არსებულ თუ ნებისმიერ მომავალ მთავრობებს შემდეგი ათწლეულების განმავლობაში დაავალდებულებს ამ ნიშნულის შენარჩუნებას. უფრო მეტიც, სახელმწიფოს მხრიდან ბიუჯეტის მეოთხედის ინვესტირება განათლებაში, კერძო სექტორის მხრიდანაც გამოიწვევს ამ მიმართულებით ინვესტიციების ზრდას, რაც ნიშნავს იმას, რომ სწორედ განათლების სექტორი გახდება ჩვენი ეკონომიკის დომინანტი სეგმენტი, 10 - 11%-იანი ზრდით“,- განაცხადა პრემიერმა.