პენიტენციურ სისტემაში წვევამდელებს აღარ გაიწვევენ - ამის შესახებ ჟურნალისტებს პარლამენტის თავდაცვის კომიტეტის თავმჯდომარემ, ირაკლი სესიაშვილმა განუცხადა.
მისი თქმით, ეს მოხსნის დისკომფორტს, რომელიც წვევამდელებს ამ სისტემაში სამსახურის დროს აქვთ.
ამ ინიციატივაზე უფრო ვრცლად იუსტიციის მინისტრმა, თეა წულუკიანმა ისაუბრა.
„[პენიტენციურ დაწესებულებებში] ეტაპობრივად მთლიანად გადავიდეთ საკონტრაქტო სამსახურზე, რათა ეს სამსახური იყოს მიმზიდველი ახალგაზრდებისთვის, რომ მათთვის, ვისაც კონტრაქტის საფუძველზე დააინტერესებს, იმსახურონ პენიტენციური დაწესებულებების უსაფრთხოების სფეროში. ეს დიდ ფინანსურ დანახარჯთან არის დაკავშირებული. მივაღწიეთ შეთანხმებას, რომ ყველა ახალ დაწესებულებაში, რომელიც უნდა გაიხსნას და მშენებლობები მიმდინარეობს, იქ უკვე ახალი სისტემა გვექნება, ანუ გარე პერიმეტრს დაიცავენ არა წვევამდელები, არამედ კონტრაქტით დასაქმებული პირები. 15 მოქმედ დაწესებულებაში, სამოქმედო გეგმის საფუძველზე, ეტაპობრივად შევცვლით მოქმედ სისტემას ახალი სიტემით" - თქვა წულუკიანმა.
