პრემიერ-მინისტრის თქმით, განათლების რეფორმის შედეგად, რომელიც მთავრობამ დააანონსა, მასწავლებლის ხელფასი 1500-დან 1800 ლარამდე იქნება. 

ტელეკომპანია „იმედის" ეთერში მან საქსტატის მონაცემები მოიყვანა მაგალითად და განაცხადა, რომ განათლების სექტორში ხელფასი არის ერთ-ერთი ყველაზე დაბალი.

„გეგმის მიხედვით, ჩვენი დიაპაზონი ხელფასისა, რომელიც მასწავლებელმა უნდა მიიღოს, იქნება 1500-დან 1800 ლარამდე, რაც იმას ნიშნავს, რომ ფაქტობრივად 3-ჯერ ვზრდით ანაზღაურებას" - თქვა პრემიერმა.

12 მარტს პრემიერ-მინისტრმა, მამუკა ბახტაძემ განაცხადა, რომ მომავალ წელს განათლების ბიუჯეტი 2 მლრდ ლარი იქნება, 2022 წლისთვის კი 3,4 მლრდ-მდე გაიზრდება. 

პრემიერის თქმით, მთავრობა მუშაობს კანონპროექტზე, რომელიც განათლების ბიუჯეტისთვის მშპ-ს 6%-ის გამოყოფას მომავალ მთავრობებსაც დაავალდებულებს. 

„მიმდინარე წელს მნიშვნელოვნად გავზარდეთ და გავზრდით ბიუჯეტს განათლების სექტორისთვის. მიმდინარე წელს ის შეადგენს 1,600 მლრდ ლარს. მომავალ წელს ის გახდება 2 მლრდ ლარი. შემდეგ გაიზრდება ნახევარი მილიარდი ლარით და უკვე 2022 წელს მიაღწევს 3,4 მლრდ ლარს. ეს ვალდებულება შემდეგი ათწლეულების განმავლობაში გადაეცემა ყველა ხელისუფლებას" - თქვა პრემიერმა.