იუსტიციის უმაღლესი საბჭოს არამოსამართლე წევრი ანა დოლიძე მთაწმინდის მაჟორიტარულ ოლქში დეპუტატად კენჭს არ იყრის. ამის შესახებ ინფორმაცია ანა დოლიძემ სოციალური ქსელით გაავრცელა.
„ამის ძირითადი მიზეზი ისაა, რომ ერთი წლის წინ, იუსტიციის საბჭოში წევრობის მომენტიდან, მე წამოვიწყე დიდი ბრძოლა სამართლიანობისათვის საქართველოში. ახლა როდესაც მიმდინარეობს უზენაეს სასამართლოში მოსამართლეების დანიშვნის პროცესი და ვდგავართ სერიოზული რისკის ქვეშ, რომ სამართლიანობას საბოლოოდ დაეპატრონება ერთი ჯგუფი, მურუსიძე-ჩინჩალაძის სახელით, როგორც არასდროს სჭირდება ამ ბრძოლას ყველა ძალის კონცენტრირება, რომ მივიყვანოთ ბოლომდე," - წერს ანა დოლიძე.
მთაწმინდის მაჟორიტარულ საარჩევნო ოლქში შუალედური არჩევნები 2019 წლის 19 მაისს 31 საარჩევნო უბანზე გაიმართება.
