პარლამენტის წევრის, ირაკლი ხახუბიას შვილის, ბექა ხახუბიას დაღუპვის საქმეზე პატრულის თანამშრომლებს გორის სასამართლომ განაჩენი გამოუტანა.
საპატრულო პოლიციის ათმეთაური ნუკრი ხაბელაშვილი სასამართლომ უდანაშაულოდ ცნო.
გია სადაღაშვილი ცნობილი იქნა დამნაშავედ სისხლის სამართლის კოდექსის 116-ე მუხლის პირველი ნაწილით, რისთვისაც სასჯელის სახედ და ზომად განესაზღვრა 2 წლით და 6 თვით თავისუფლების აღკვეთა.
რაც შეეხება ზურაბ რუსიშვილს, იგი გამართლდა სსკ-ის 116-ე მუხლის პირველ ნაწილში, თუმცა დამნაშავედ ცნეს 333-ე მუხლის პირველ ნაწილში და სასჯელის ზომად განესაზღვრა 1 წლით და 6 თვით თავისუფლების აღკვეთა.
ბრალდების მხარე არ ეთანხმება განაჩენს და სააპელაციო სასამართლოში გასაჩივრებას აპირებს.
პარლამენტის წევრის, ფოთის მაჟორიტარი დეპუტატის, ირაკლი ხახუბიას შვილი, 21 წლის ბექა ხახუბია ავტოავარიას 2018 წლის 17 მაისს ემსხვერპლა. მას გორის გვირაბთან სატვირთო ავტომანქანით გზა გადაუკეტეს. 24 მაისს ბექა ხახუბიას ავარიის გამო 2 პოლიციელი თანამდებობიდან გათავისუფლდა. მოგვიანებით ამ საქმეზე ბრალი 3 პოლიციელს წარუდგინეს, სასამართლომ ისინი წინასწარი პატიმრობიდან 1000-ლარიანი გირაოს სანაცვლოდ გაათავისუფლა.
