თბილისში ზიანის შემცირების კონფერენცია მიმდინარეობს. ორი დღის განმავლობაში კონფერენციის მონაწილეები ნარკოპოლიტიკასა და ზიანის შემცირების ხელმისაწვდომობაზე მსჯელობენ.
ზიანის შემცირების კონფერენციის ერთ-ერთმა ორგანიზატორმა გიორგი სოსელიამ დღეს, კონფერენციის მიმდინარეობისას, სოციალური მუშაკების როლსა და მნიშვნელობაზე ისაუბრა და აღნიშნა, რომ კონფერენციის ორგანიზატორები სოციალური მუშაკების გაფიცვას მხარს უჭერენ.
„სოციალური მუშაკების ასოციაციის წარმომადგენელები უნდა ყოფილიყვნენ აქ, თუმცა გაფიცვის გამო ვერ მოახერხეს აქ ყოფნა. სოციალური მუშაობა ზიანის შემცირების, ადამიანის უფლებების განუყოფელი ნაწილია. მინდა, გითხრათ, რომ კონფერენციის ორგანიზატორთა სახელით გავავრცელებთ განცხადებას და ოფიციალურად დავუჭერთ მხარს სოციალურ მუშაკებს. ვგმობთ სახელმწიფოს იმ დამოკიდებულებას, რომელიც პირდაპირ მიმართულია ამ უმნიშვნელოვანესი საქმისა და პროფესიის დისკრედიტაციისკენ.“ - განაცხადა გიორგი სოსელიამ.
სოციალური მუშაკები მესამე დღეა, გაფიცულები არიან.
