დიმიტირ ლორთქიფანიძის, გურამ ფალავანდიშვილის, ლევან ჩაჩუას ორგანიზებით, ირანის საელჩოსთან აქცია იმართება. აქციის მონაწილეები ფილარმონიაში ირანელი მომღერლის გამოსვლას აპროტესტებენ, რომელშიც მათი მტკიცებით, მომღერალმა ქართველებს შეურაცხყოფა მიაყენა.
ირანის ელჩმა სეიედ ჯავად ყავამ შაჰიდმა აქციის ორგანიზატორები საელჩოში შეიპატიჟა და მათთან მოლაპარაკება გამართა. გურამ ფალავანდიშვილი, ლევან ჩაჩუა და დიმიტირ ლორთქიფანიძე მომღერლის გამოსვლაზე პასუხისმგებლობას საელჩოს აკისრებენ და მისგან ახსნა-განმარტებას მოითხოვდნენ.
ელჩის თქმით, მომღერალს საელჩოსთან, მათ შორის, მის კულტურულ ატაშესთან არანაირი შეხება არ ჰქონია. ერთადერთი კავშირი მათსა და გამომსვლელს შორის ეთნიკური წარმომავლობაა. შესაბამისად, საელჩო პასუხისმგებლობას ვერ აიღებს მომღერლის სიტყვებზე.
აქციის ორგანიზატორებმა მომღერლის გამოსვლის შემდეგ ელჩს პასუხი ირანის რესპუბლიკის პრეზიდენტის ჰასან როუჰანის სიტყებზეც მოსთხოვეს. მათი თქმით, როუჰანიმ ადრე განაცხადა, რომ კავკასია წლების განმავლობაში ირანის ნაწილი იყო და ის სუსტი მმართველების გამო დაიკარგა. ასევე საელჩოს ქართულენოვანი წარწერის გაკეთებაც მოსთხოვეს, რასაც ელჩი დასთანხმდა.
ირანელი მომღერლის გამოსვლას Facebook-ზე გამოეხმაურა აღმოსავლეთმცოდნე გიორგი ლობჟანიძეც. მისი თქმით, მომღერლის სიტყვების არასწორი ციტირება მოხდა, რასაც ქვეყანაში ანტიირანული განწყობების გაღრმავება მოჰყვა.
„საინტერესოა, ვინ თარგმნა ის ტექსტი, რომელიც ამ ვიდეოს ტიტრებად ადევს; ვინ არის საქართველოში ირანული ჟარგონისა და არგოს ისეთი მცოდნე, რომ იქ, სადაც ადამიანი ამბობს, მე რომ მოვწიო, რა მოხდებაო, – ვიღაც თარგმნის: მე რომ მოვწიო, ამათ რა ჩემი ის იმასუნდამიქნანო“,- წერს გიორგი ლობჟანიძე Facebook-ზე.
