სახალხო დამცველის მოადგილის გიორგი ბურჯანაძის თქმით, სახალხო დამცველის წარმომადგენლებმა ექვსივე დაკავებული პირი მოინახულეს და მისი თქმით, ისინი თავს ნორმალურად გრძნობენ.
„ჩვენ ისინი დაკავებისთანავე მოვინახულეთ, მიზანი იყო გვენახა, როგორ გრძნობენ თავს, მათი უფლებები ამ ეტაპისთვის ხომ არ ირღვეოდა, პრეტენზიებს ისინი არ გამოხატავდნენ უშუალოდ დაკავებასთან და მოპყრობასთან დაკავშირებით, ახლა მათთან შესულები არიან ადვოკატები და მიმდინარეობს სხვადასხვა საპროცესო ღონისძიებები“,-განაცხადა სახალხო დამცველის მოადგილემ გიორგი ბურჯანაძემ.
შს სამინისტროს ინფორმაციით, აქციაზე პოლიციამ სულ 6 პირი დააკავა.
შსს-ს ცნობით, აქციის მიმდინარეობისას საზოგადოებრივი წესრიგისა და პოლიციელის კანონიერი მოთხოვნის დაუმორჩილებლობისთვის ადმინისტრაციული სამართალდარღვევათა კოდექსის 166-ე და 173-ე მუხლებით დაკავებულია 6 პირი.
დაკავებულები ვაკის პოლიციის განყოფილებაში იმყოფებიან.
არსებული ინფორმაციით, დაკავებულნი არიან ცოტნე ცხვედიანი, გიორგი კობახიძე, გიორგი სოფრომაძე, ვახუშტი მენაბდე და დავით სუბელიანი.
დღეს მუშების მხარდამჭერი აქცია მთავრობის კანცელარიის შენობასთან დაიწყო და ჭავჭავაძის გამზირისკენ მსვლელობით გაგრძელდა.
აქციის მონაწილეების მხრიდან ჭავჭავაძის გამზირის გადაკეტვის მცდელობას შეხლა - შემოხლა მოჰყვა აქციის მონაწილებსა და პოლიციას შორის.
