„პატრიოტთა ალიანსის“ წევრმა, დეპუტატმა ემზარ კვიციანმა პარლამენტში განაცხადა, რომ კანონის ის მუხლი, რომელიც ქურდული სამყაროს წევრობისთვის დანაშაულს განსაზღვრავს, „ახალგაზრდა ქართველების გენოციდისთვისაა გამოგონილი“. 

„ახლა მინდა შევეხო ასეთ რამეს, რასაც ჰქვია ქურდული ტრადიციები და 243 პრიმა მუხლს, რომელიც ახალგაზრდა ქართევლების გენოციდისთვისაა გამოგონილი. 5 ახალგაზრდა დაიჭირეს იმის გამო,  რომ 20 -20 ლარი თუ 30 ლარი ვიღაც კანონიერი ქურდის დედას შეუგროვეს იმისთვის, რომ ჩავიდეს თავის შვილთან.

ან რა არის ეს ქურდული ტრადიციები, ვინმე დაფიქრებულა ამაზე? ეს ქურდული ტრადიციები გადმოსულია ქართული ტრადიციებიდან, გადმოსულია კავკასიური ტრადიციებიდან და, რატომღაც, ქურდული დაარქვეს და ჩვენ ამ ქართული და კავკასიური ტრადიციების გულისთვის ციხეში გავუშვათ ყველა და ჩავჯდეთ მაშინ სუყველა ციხეში. რაღაცა მოსაფიქრებელია ამასთან დაკაშირებით," - განაცხადა ემზარ კვიციანმა. 

2014 წლის 15 ივლისს ევროსასამართლოს მიერ მიღებული გადაწყვეტილებით, ორგანიზებული დანაშაულისა და რეკეტის შესახებ 2005 წელს საქართველოში მიღებული საკანონმდებლო პაკეტი, რომელმაც კანონიერი ქურდობა დასჯადი გახადა, არ არღვევს ადამიანის უფლებათა კონვენციას.