„ქართული ოცნებიდან“ წასული დეპუტატები ეკა ბესელია და ზვიად კვაჭანტირაძე ევროპის საბჭოს საპარლამენტო ასამბლეის დელეგაციიდან ამოწერეს. ეს გადაწყვეტიილება საგარეო ურთიერთობათა კომიტეტმა მიიღო და მუდმივმოქმედი საპარლამენტო დელეგაციების ახალი შემადგენლობები დაამტკიცა.
სოფიო ქაცარავას განმარტებით, დელეგაციებში ცვლილებების შეტანის საჭიროება პარლამენტში მომხდარმა გადაჯგუფებებმა განაპირობა. ეს არის ტექნიკური ცვლილება, რადგან ეკა ბესელია და ზვიად კვაჭანტირაძე დელეგაციაში „ქართული ოცნების“ კვოტით შევიდნენ.
ეკა ბესელიამ კი გადაწყვეტილება პოლიტიკურ ანგარიშსწორებად შეაფასა. მისი თქმით, ევროსაბჭოს რეგულაციებით, საპარლამენტო დელეგაციის შეცვლა 1 იანვრამდე ვერც მოხდება.
ამის მიუხედავად, დელეგაციაში ცვლილებას კომიტეტმა მხარი მაინც დაუჭირა, მაგრამ 2020 წლის პირველ იანვრამდე ევროპის საბჭოში საქართველო ძველი დელეგაციით იქნება წარმოდგენილი.
