ენერგოომბუდსმენი სალომე ვარდიაშვილი მთავრობის დაჩქარებული წესით რეგულაციების შემოღებას მოუწოდებს.
მისი თქმით, დიღმის მასივში მომხდარ აფეთქებას ის შეისწავლის.
„მე მოვუწოდებ საქართველოს მთავრობას, რომ დავაჩქაროთ ამ რეგულაციების განხილვა და საკანონმდებლო ორგანომდე მიტანა.
პასუხისმგებლობის ნაწილს აუცილებლად შევისწავლი კონკრეტულად კომპანიის ქმედებებთან დაკავშირებით. მე, როგორც ენერგოომბუდსმენს მაინტერესებს, კომპანიამ იქ ზუსტად შეასრულა თუ არა თავისი ვალდებულებები და ამის შემდეგ გვეცოდინება მოიქცა იმ ნორმების ფარგლებში კომპანია და გააკეთა თუ არა ყველა ის ქმედება, რაც უნდა გაეკეთებინა“, - განაცხადა სალომე ვარდიაშვილმა „რუსთავი 2-თან“.
გუშინ დიღმის მასივში გაზის აფეთქების შედეგად რამდენიმე ადამიანი დაშავდა.
მომხდარის შესახებ „ყაზტრანსგაზში“ განაცხადეს, რომ შემთხვევის მიზეზი, სავარაუდოდ, ექსპლუატაციის წესების უხეში დარღვევა გახდა.
„სავარაუდოდ, ექსპლუატაციის წესების უხეში დარღვევა გახდა დიღმის მასივში მე-4 კვარტლის მე-5 კორპუსში ბუნებრივი გაზის დაგროვების და მომხდარი აალების მიზეზი. შემთხვევას არ მოჰყოლია მსხვერპლი, ამ დროისთვის მიმდინარეობს შემთხვევის ადგილის დათვალიერება და შესაბამისი საგამოძიებო მოქმედებები“, - ნათქვამია ყაზტრანსგაზის განცხადებაში.