იურიდიულ, ადამიანის უფლებათა და საფინანსო საბიუჯეტო კომიტეტების გაერთიანებულ სხდომაზე დღეს პროფესიული კავშირის „სოლიდარობის ქსელი-მშრომელთა ცენტრის“ მომზადებულ კანონპროექტს განიხილავენ, რომლის ინიციატორიც დეპუტატი ბექა ნაცვლიშვილია.
ბექა ნაცვლიშვილის თქმით, კანონპროექტის მიზანია, სრულყოფილად ჩამოაყალიბოს დასაქმებულის დეფინიცია და მკვეთრად გამიჯნოს ერთმანეთისაგან შრომითი და მომსახურების ხელშეკრულება.
„საქართველოს შრომის კოდესის არსებულ რედაქციაში დასაქმებულის დეფინიცია ბუნდოვანია და თითქმის არ განსხვავდება მომსახურების/ნარდობის ურთიერთობის განმარტებისგან, რაც საშუალებას აძლევს დამსაქმებლებს შრომითი ურთიერთობის მომსახურების ხელშეკრულებად შენიღბვის გზით თავი აარიდონ შრომის კოდექსით მათზე დაკისრებულ ვალდებულებებს“, - განაცხადა ნაცვლიშვილმა. მისი თქმით, ეს ბუნდოვანი განსაზღვრება დასაქმებულებს ანაზღაურებადი შვებულების, ზეგანაკვეთური სამუშაოს გაზრდილი ოდენობით ანაზღაურებისა და სხვა შრომითი უფლებების სრულყოფილად რეალიზების საშუალებას ართმევს.
„მომსახურების/ნარდობის ხელშეკრულების დადება, როგორც წესი, დამსაქმებლის სურვილით ხდება. სამუშაო ადგილებისა და დასაქმების პრობლემის გათვალისწინებით ეკონომიკურად უფრო ძლიერი მხარის ამ ქმედებას ვერ ეწინააღმდეგება ბევრი დასაქმებული. შესაბამისად კანონის სრულყოფა, მომსახურების და შრომის ხელშკრულების გამიჯვნა, ამ უკანასკნელის ცნების არაორაზროვნად ჩამოყალიბება დამსაქმებლებს მოუსპობს საშუალებას, ბოროტად ისარგებლონ მშრომელთა დაქვემდებარებული მდგომარეობით“, - განაცხადა ბექა ნაცვლიშვილმა.
