საზოგადოებრივი მაუწყებლის ცნობით, მუსლიმური ორგანიზაციის ხელმძღვანელი ფრანგ მუსლიმებს პარიზის ღვთისმშობლის ტაძრის აღდგენის დაფინანსებისკენ მოუწოდებს.
„ჩემი აზრით, მათი ვალდებულებაა, როგორც მოქალაქეებისა და მუსლიმების, მიიღონ მონაწილეობა ამ ულამაზესი ტაძრის აღდგენაში“, - განაცხადა რონის მეჩეთების საბჭოს პრეზიდენტმა, ქამელ კაბტანმა.
ანალოგიური მოწოდებით გამოვიდა „მუსლიმთა რწმენის ფრანგული საბჭოც“. ორგანიზაციის განცხადებაში საფრანგეთის მოქალაქე მუსლიმებს მოუწოდებენ, ჩაერთონ უნიკალური ტაძრის რეკონსტრუქციაში.
„ფრანგ მუსლიმებს მოვუწოდებთ, ჩაერთონ ფინანსურ ძალისხმევაში, რომელიც მიმართულია არქიტექტურული შედევრის რეკონსტრუქციაში, რადგან ეს ტაძარი არის საფრანგეთის სიმბოლო“, - ნათქვამია განცხადებაში.
პარიზის ღვთისმშობლის ტაძარში 15 აპრილის საღამოს ხანძარი გაჩნდა. ხანძრის შედეგად ჩამოინგრა ტაძრის შპილი და დაიწვა სახურავის ნაწილი.
