„მაღალი საზოგადოებრივი ინტერესის გათვალისწინებით, განვმარტავთ დადგენილ პრაქტიკას საქართველოს სისხლის სამართლის კოდექსის 260-ე მუხლით წარდგენილ ბრალდებასთან დაკავშირებით". - აცხადებენ საქართველოს პროკურატურაში.
„როდესაც პირს წარდგენილი აქვს ბრალდება საქართველოს სისხლის სამართლის კოდექსის 260 მუხლის 1, 2 ან 3 ნაწილით, არ არის ნასამართლევი, აღიარებს ჩადენილ დანაშაულს და სახეზე არ არის ნარკოტიკული საშუალების გასაღების მიზანი, პროკურატურა, დადგენილი პრაქტიკის შესაბამისად, სასამართლოს წინაშე შუამდგომლობს არასაპატიმრო აღკვეთის ღონისძიების შეფარდების მოთხოვნით. აღნიშნული პრაქტიკა, პროკურატურის მიერ გამოიყენება ყველა იმ შემთხვევაში, თუ ბრალდებული პირი აკმაყოფილებს ზემოთ ჩამოთვლილ პირობებს" - ვკითხულობთ განცხადებაში.
________________________
რამდენიმე წუთის წინ შინაგან საქმეთა სამინისტროში „ლიბერალს“ განუცხადეს, რომ დასრულდა მსახიობ ლევან ჯიბღაშვილის ავტომობილიდან ამოღებული ნივთიერებების ექსპერტიზა.
„ექსპერტიზით დადგინდა, რომ კოკაინი - 0,5659გ. ექსტაზი(MDMA) - 0,1921გ. - ნათქვამია უწყების განცხადებაში.
ნარკოდანაშაულში ბრალდებულ ლევან ჯიბღაშვილს გუშინ სასამართლომ აღკვეთის სახით გირაო შეუფარდა.
მსახიობ ლევან ჯიბღაშვილს ბრალი სისხლის სამართლის კოდექსის 260-ე მუხლის პირველი და მე-3 ნაწილით წაუყენეს, რაც თავისუფლების აღკვეთით, ვადით, 5-დან 8 წლამდე ისჯება.